शहादा, दि. २३ (प्रतिनिधी) — नंदुरबार जिल्ह्यात रक्तदानाच्या कार्यातून वेगळी ओळख निर्माण करणाऱ्या श्री छत्रपती ब्लड फाऊंडेशनला बिहारमधील गया येथे ‘आंतरराष्ट्रीय शहीद भगतसिंह युथ बिग्रेड बिहार-2026’ या प्रतिष्ठित पुरस्काराने सन्मानित करण्यात आले.
फाऊंडेशनचा हा यावर्षीतील पाचवा राष्ट्रीय पुरस्कार ठरला असून, त्यांच्या कार्याची दखल देश-विदेशात घेतली जात आहे. गया येथे झालेल्या भव्य समारंभात अरुण साळुंखे व रामकृष्ण पाटील यांनी हा सन्मान स्वीकारला. कार्यक्रमास देशभरातील विविध राज्यांसह नेपाळमधील सामाजिक संस्थांचे प्रतिनिधी उपस्थित होते.
रक्तदानाच्या माध्यमातून आपत्कालीन परिस्थितीत तात्काळ मदत पोहोचवणाऱ्या या संस्थेच्या कार्यामुळे नंदुरबार जिल्हा “रक्तदात्यांचा जिल्हा” म्हणून ओळखला जाऊ लागला आहे. संस्थापक अरुण साळुंखे यांनी हा सन्मान प्रत्येक रक्तदात्याच्या सेवाभावाचा असल्याचे सांगितले.
