शहादा, दि. २३ (प्रतिनिधी) — पाडळदा (ता. शहादा) येथे दिव्यांग बांधवांच्या प्रलंबित समस्या सोडवण्यासाठी तसेच शासकीय योजनांची माहिती देण्यासाठी दि. २३ मार्च रोजी विशेष मार्गदर्शन शिबिराचे आयोजन करण्यात आले. जिल्हा दिव्यांग पुनर्वसन केंद्र (DDRC), नंदुरबार आणि राष्ट्रीय दिव्यांग विकास महासंघ, जिल्हा शाखा नंदुरबार यांच्या संयुक्त विद्यमाने हे शिबीर उत्साहात पार पडले.
कार्यक्रमाचा प्रारंभ मान्यवरांच्या हस्ते हेलन केलर आणि लुईस ब्रेल यांच्या प्रतिमांचे पूजन करून करण्यात आला. यावेळी दिव्यांग बांधवांनी स्वावलंबी होण्यासाठी या महान व्यक्तींचा आदर्श प्रेरणादायी असल्याचे मान्यवरांनी सांगितले.
या शिबिरात दिव्यांगांसाठी विविध तांत्रिक व प्रशासकीय कामांबाबत मोलाची मदत करण्यात आली. युथ फॉर जॉब्स संस्थेचे जिल्हा समन्वयक लालसिंग पावरा यांच्या मार्गदर्शनाखाली एकूण ३५ दिव्यांग बंधू-भगिनींची नोंदणी करण्यात आली. त्यापैकी १५ जणांची ई-केवायसी प्रक्रिया पूर्ण करण्यात आली, तर ५ नवीन युनिक आयडी (UDID) कार्डसाठी अर्ज सादर करण्यात आले. तसेच २ लाभार्थ्यांच्या जन्मतारखांमधील त्रुटी दुरुस्त करण्यात आल्या.
तपासणीदरम्यान ६ ते ७ दिव्यांगांकडे अद्याप ऑनलाइन अपंगत्व प्रमाणपत्र नसल्याचे निदर्शनास आले. संबंधितांना पुढील प्रक्रियेसाठी आवश्यक मार्गदर्शन करण्यात आले.
या शिबिराला दिव्यांग बांधवांचा उत्स्फूर्त प्रतिसाद लाभला. कार्यक्रमाच्या यशस्वीतेसाठी राष्ट्रीय दिव्यांग विकास महासंघाचे राज्य उपाध्यक्ष शिवाजीराव मोरे, जिल्हाध्यक्ष राजाभाऊ कुवर, पाडळदा गावचे सरपंच राजेंद्रभाई पाटील, सुनिताताई कुवर, योगिता पाटील, दिनेश पाटील, चंद्रकांत पाटील आणि शांतीलाल पाटील यांनी विशेष परिश्रम घेतले.
उपस्थित दिव्यांग बांधवांनी या उपक्रमाबद्दल समाधान व्यक्त करत, अशा शिबिरांमुळे ग्रामीण भागातील दिव्यांगांना जिल्हास्तरावर न जाता स्थानिक पातळीवरच आवश्यक सेवा व मार्गदर्शन मिळत असल्याचे मत व्यक्त केले.
