अंदरसूल (प्रतिनिधी – सुनिल गायकवाड): अंदरसूल येथील ईदगाह मैदानावर Eid al-Fitr निमित्त दि. २१ रोजी सकाळी साडेनऊ वाजता गाव व परिसरातील मुस्लिम बांधवांनी मोठ्या उत्साहात सामूहिक नमाज अदा केली.
यावेळी हाफीज मोहंमद शमीम यांनी ईद-उल-फित्र सणाचे महत्त्व विषद करत नमाजपूर्वी जकात व दानधर्म करण्याचे महत्त्व सांगितले. तसेच जगात सर्वत्र शांतता व समृद्धी नांदावी यासाठी अल्लाहकडे सामूहिक प्रार्थना करण्यात आली.
दरम्यान, रमजान महिन्यात तरावीह नमाज पठण केल्याबद्दल हाफीज मोहंमद शमीम यांचा मुस्लिम बांधवांच्या वतीने यथोचित सन्मान करण्यात आला. तसेच अंदरसूल बाजार समितीचे माजी सभापती व लोकनेते मकरंद सोनवणे यांनीही त्यांचा सत्कार करून सर्व मुस्लिम बांधवांना ईदच्या शुभेच्छा दिल्या.
नमाज पठणानंतर मुस्लिम बांधवांनी एकमेकांना गळाभेट देत ईदच्या शुभेच्छा दिल्या.
या प्रसंगी ग्रामीण पोलीस स्टेशनचे पोलीस निरीक्षक संदीप मंडलिक, पोलीस उपनिरीक्षक प्रल्हाद पवार, सहाय्यक पोलीस उपनिरीक्षक दौलत ठोंबरे, तसेच स्थानिक मान्यवर व मोठ्या संख्येने मुस्लिम बांधव उपस्थित होते.
