विटा (प्रतिनिधी): सुळेवाडी परिसरात आर्टिका कारचा भीषण अपघात घडल्याची धक्कादायक घटना समोर आली असून या अपघातात ५ ते ६ प्रवासी गंभीर जखमी झाले आहेत. जखमींवर सध्या विटा येथील ओम श्री रुग्णालयात उपचार सुरू आहेत.
मिळालेल्या प्राथमिक माहितीनुसार, संबंधित आर्टिका कारमधील सर्व प्रवासी आरेवाडी येथून पुण्याकडे जात होते. सुळेवाडी नजीक अचानक चालकाचे नियंत्रण सुटल्याने गाडी रस्त्याच्या कडेला असलेल्या बोर्डिंगवर जाऊन आदळली. धडक इतकी भीषण होती की, गाडीने अनेक पलट्या घेत रस्त्यालगतच्या नाल्यात जाऊन उलटली.
या अपघातात गाडीचे मोठ्या प्रमाणात नुकसान झाले असून, धडकेची तीव्रता एवढी होती की वाहनातील सर्व एअरबॅग उघडल्या गेल्या. अपघातात चालकासह ५ ते ६ जण गंभीर जखमी झाल्याची माहिती मिळत आहे.
घटनेची माहिती मिळताच स्थानिक नागरिकांनी तातडीने मदतकार्य सुरू करत जखमींना रुग्णालयात दाखल केले. या घटनेमुळे परिसरात काही काळ खळबळ उडाली होती. पुढील तपास सुरू असल्याची माहिती पोलिसांकडून मिळाली आहे.
