आदिवासी मुलींच्या शासकीय वसतिगृहात प्रेरणादायी कार्यक्रम
राजुरा (तालुका प्रतिनिधी) : गोंडवाना भागातील आदिवासी स्वातंत्र्यसैनिक बाबुराव शेडमाके यांची जयंती आदिवासी मुलींच्या शासकीय वसतिगृह, राजुरा येथे उत्साहात साजरी करण्यात आली. कार्यक्रमाची सुरुवात बिरसा मुंडा आणि शहीद बाबुराव शेडमाके यांच्या प्रतिमेला पुष्पहार अर्पण करून व दीपप्रज्वलनाने करण्यात आली.
या कार्यक्रमाच्या अध्यक्षस्थानी वसतिगृहाच्या गृहपाल जे. ए. गाजर्लावार मॅडम होत्या. प्रमुख अतिथी म्हणून शुभम कोसनोवार (शिक्षक, इफंट स्कूल राजुरा), शिवम तलारे (गृहपाल, आदिवासी मुलांचे शासकीय वसतिगृह राजुरा) तसेच विधी स्वयंसेवक व सामाजिक कार्यकर्ते मिलिंद गड्डमवार उपस्थित होते.
आपल्या अध्यक्षीय भाषणात गाजर्लावार मॅडम यांनी बाबुराव शेडमाके यांच्या कार्याचा आढावा घेतला. १८५७ च्या स्वातंत्र्य संग्रामात त्यांनी ब्रिटिशांविरुद्ध बंड पुकारून गोंड व आदिवासी समाजाला एकत्र आणले. त्यांच्या नेतृत्वाखाली अनेक ठिकाणी ब्रिटिश सत्तेविरुद्ध लढा देण्यात आला. मात्र ब्रिटिशांनी कपटाने त्यांना पकडून २१ ऑक्टोबर १८५८ रोजी चंद्रपूर कारागृहात फाशी दिली. त्यांच्या बलिदानामुळे ते आजही आदिवासी समाजासाठी प्रेरणास्थान आहेत, असे त्यांनी सांगितले.
यावेळी शुभम कोसनोवार यांनी इंग्रजी भाषेचे महत्त्व अधोरेखित केले, तर शिवम तलारे यांनी शिक्षणातील विविध शाखांचे करिअरमधील महत्त्व स्पष्ट केले. मिलिंद गड्डमवार यांनी “सामाजिक जाणीव” या विषयावर मार्गदर्शन करत विद्यार्थिनींना जागरूक नागरिक बनण्याचे आवाहन केले.
कार्यक्रमाचे संचालन कु. स्नेहा किन्नाके यांनी केले, तर आभार प्रदर्शन अस्मिता मडावी यांनी मानले. वसतिगृहातील विद्यार्थिनींची उपस्थिती लक्षणीय होती.
