नांदगाव खंडेश्वर (प्रतिनिधी) : नांदगाव खंडेश्वर येथे ईद-उल-फित्र सण मोठ्या उत्साहात आणि आनंदात साजरा करण्यात आला. गुरुवारी सकाळी ८ वाजता अमरावती रोडवरील ईदगाह मैदानावर मुस्लिम बांधवांनी मोठ्या संख्येने एकत्र येत नमाज अदा केली.
यावेळी मौलाना सय्यद जुनैद साहेब यांच्या नेतृत्वाखाली नमाज अदा करण्यात आली, तर मौलाना सय्यद हिसामोद्दीन साहेब यांनी ईदचे महत्व सांगणारे मार्गदर्शन (बयान) केले. त्यांनी शांतता, बंधुभाव आणि सामाजिक सलोखा टिकवण्यासाठी प्रार्थना करण्याचे आवाहन केले.
ईदच्या निमित्ताने लहान मुलांमध्ये विशेष उत्साह पाहायला मिळाला. नमाज संपल्यानंतर सर्वांनी एकमेकांना मिठी मारून “ईद मुबारक”च्या शुभेच्छा दिल्या आणि आनंद व्यक्त केला.
कायदा व सुव्यवस्था अबाधित राखण्यासाठी नांदगाव खंडेश्वर पोलीस ठाण्याचे ठाणेदार लाबंडे यांच्या नेतृत्वाखाली कडक पोलीस बंदोबस्त ठेवण्यात आला होता.
या प्रसंगी माजी जिल्हा परिषद सदस्य निशिकांत जाधव, नगरसेवक प्रकाश मारोटकर, नगरपंचायत उपाध्यक्ष शेख जमीर, राहुल गुंलाने, बांधकाम सभापती मोहम्मद रियाज, अथर खान, जावेद पठाण तसेच इतर मान्यवर व पोलीस अधिकारी उपस्थित होते. सर्वांनी मुस्लिम बांधवांना ईदच्या शुभेच्छा दिल्या.
या उत्सवात सर्व समाजातील नागरिकांनी सहभाग घेत सामाजिक ऐक्य व एकतेचा सुंदर संदेश दिला.
