मलठण (प्रतिनिधी) : मलठण गावातील एचपी पेट्रोल पंपावर आज पेट्रोल, डिझेल व गॅस टंचाईच्या अफवेमुळे ग्राहकांची प्रचंड गर्दी उसळल्याचे चित्र पाहायला मिळाले. दोनचाकी, चारचाकी तसेच अवजड वाहनांच्या लांबलचक रांगा पंपावर दिसून आल्या.
सदर गर्दी ही प्रत्यक्ष तुटवड्यामुळे नसून गैरसमज आणि अफवांमुळे निर्माण झाल्याचे समोर आले आहे. नागरिकांनी “इंधन संपणार” या भीतीने मोठ्या प्रमाणावर पेट्रोल-डिझेल भरण्यासाठी गर्दी केली.
दरम्यान, पंप व्यवस्थापनाकडून स्पष्ट करण्यात आले की, इंधनाचा कोणताही तुटवडा नसून नागरिकांनी घाबरून जाण्याचे कारण नाही. पेट्रोल पंप मालक उदयराजे पवार आणि कर्मचाऱ्यांनी शिस्तबद्ध पद्धतीने रांगा लावून सर्व वाहनधारकांना इंधन पुरवठा सुरू ठेवला.
यावेळी गावातील सरपंच, उपसरपंच, पोलीस मित्र तसेच सामाजिक कार्यकर्ते सुरेश आप्पा गायकवाड यांनी नागरिकांना अफवांवर विश्वास न ठेवण्याचे आवाहन केले.
प्रशासन आणि स्थानिक नागरिकांनीही संयम राखण्याचे आवाहन करत, “गैरसमज दूर करून आवश्यक तेवढेच इंधन घ्यावे,” असे सांगितले.
एकंदरीत, अफवांमुळे निर्माण झालेल्या परिस्थितीतही स्थानिक पातळीवर योग्य नियोजन करून परिस्थिती नियंत्रणात ठेवण्यात आली.
