लोहारा प्रतिनिधी
उमरगा : मराठवाडा साहित्य परिषदेच्या (मसाप) उमरगा शाखेच्या वतीने साहित्यरत्न लोकशाहीर अण्णाभाऊ साठे यांच्या जयंतीनिमित्त ‘लेखन प्रेरणा दिन’ तसेच लोकमान्य बाळ गंगाधर टिळक यांच्या पुण्यतिथीनिमित्त अभिवादन कार्यक्रम उत्साहात पार पडला. कार्यक्रमाच्या अध्यक्षस्थानी मसाप शाखेचे अध्यक्ष प्रदीप पाटील होते.
कार्यक्रमाच्या प्रारंभी अण्णाभाऊ साठे व लोकमान्य टिळक यांच्या प्रतिमेला पुष्पहार अर्पण करून अभिवादन करण्यात आले. त्यानंतर मसापचे कार्यवाह गुंडू दुधभाते यांनी शासनाच्या परिपत्रकातील सूचनांचे वाचन केले. अण्णाभाऊ साठे यांच्या समृद्ध साहित्याचा प्रसार विद्यार्थी व युवकांपर्यंत व्हावा, यासाठी ग्रंथदिंडी, व्याख्याने, शाहिरी, मुलाखती तसेच विविध साहित्यिक स्पर्धांचे आयोजन करण्याचे आवाहन त्यांनी केले.
यावेळी वक्त्यांनी सांगितले की, लोकशाहीर अण्णाभाऊ साठे यांनी आपल्या अलौकिक प्रतिभेच्या जोरावर मराठी साहित्याला अमूल्य योगदान दिले. शोषित, वंचित, श्रमिक आणि कष्टकरी समाजाचे वास्तव आपल्या साहित्याद्वारे त्यांनी प्रभावीपणे मांडले. त्यांच्या साहित्याने सामाजिक परिवर्तनाची प्रेरणा दिली असून जागतिक स्तरावरही त्यांना एक लढवय्या साहित्यिक म्हणून ओळख मिळाली.
शासनाच्या निर्णयानुसार १ ऑगस्ट हा अण्णाभाऊ साठे यांचा जन्मदिन ‘लेखन प्रेरणा दिन’ म्हणून साजरा केला जात असून, नवोदित लेखकांना लेखन आणि वाचनाची प्रेरणा मिळावी, हा त्यामागील उद्देश असल्याचे यावेळी नमूद करण्यात आले. उच्च व तंत्रशिक्षण विभागांतर्गत विद्यापीठे, महाविद्यालये व संलग्न संस्थांमध्ये विविध साहित्यिक उपक्रम राबविण्याचे नियोजन सुरू असल्याची माहितीही देण्यात आली.
मसाप शाखेचे अध्यक्ष प्रदीप पाटील यांनी अखिल भारतीय साहित्य महामंडळाचे सदस्य प्रा. किरण सगर यांच्या मार्गदर्शनाखाली विविध उपक्रमांचे नियोजन करण्यात येत असल्याचे सांगितले. यावेळी कवी कमलाकर भोसले यांनी अण्णाभाऊ साठे यांची “स्मशानातील सोने” ही कथा प्रभावी शैलीत सादर करून उपस्थितांची दाद मिळवली.
कार्यक्रमाचे प्रास्ताविक कवी काशिनाथ बिराजदार यांनी केले, तर सूत्रसंचालन व आभार प्रदर्शन परमेश्वर सुतार यांनी केले. कार्यक्रमास विश्वनाथ महाजन, बाळासाहेब माळी, प्रा. शिवराम अडसूळ, अजित पाटील यांच्यासह साहित्यप्रेमी व मान्यवर मोठ्या संख्येने उपस्थित होते.
