कारवाईचा अभाव; ग्रामीण भागातील नागरिकांच्या जीवाशी खेळ सुरूच
यावल प्रतिनिधी: यावल तालुक्यात तोतया डॉक्टरांचा सुळसुळाट वाढत असून, वैद्यकीय अधिकाऱ्यांनी नोटीस बजावूनही अवैद्य व्यवसाय सुरूच असल्याचे गंभीर चित्र समोर आले आहे. संबंधितांवर ठोस कारवाई न झाल्याने प्रशासनाच्या भूमिकेवर प्रश्नचिन्ह उपस्थित होत आहे.
मिळालेल्या माहितीनुसार, तालुक्यातील अनेक गावांमध्ये बिनपरवाना व कोणतेही वैद्यकीय शिक्षण नसलेले व्यक्ती खुलेआम रुग्णांवर उपचार करत आहेत. औषधे देणे, इंजेक्शन देणे तसेच गंभीर आजारांवर उपचार करण्याचा दावा करणे असे प्रकार सर्रास सुरू आहेत. यामुळे नागरिकांच्या आरोग्याला मोठा धोका निर्माण झाला आहे.
काही दिवसांपूर्वी तालुका वैद्यकीय अधिकाऱ्यांकडून अशा तोतया डॉक्टरांना नोटीस बजावण्यात आली होती. मात्र, त्यानंतर कोणतीही ठोस कारवाई न झाल्याने संबंधित पुन्हा पूर्ववत व्यवसाय करत असल्याचे दिसून येत आहे.
यामुळे नागरिकांमध्ये संतापाची लाट असून, “केवळ नोटीस देऊन प्रशासन जबाबदारीतून मुक्त होते का?” असा सवाल उपस्थित केला जात आहे. जिल्हा वैद्यकीय अधिकाऱ्यांनी या प्रकरणाकडे गांभीर्याने लक्ष देऊन तातडीने कठोर कारवाई करावी, अशी मागणी नागरिकांकडून होत आहे.
दरम्यान, प्रशासनाच्या दुर्लक्षामुळे ग्रामीण भागातील गरीब व अशिक्षित नागरिक अशा तोतया डॉक्टरांच्या जाळ्यात अडकत असून त्यांच्या जीवाशी खेळ सुरू असल्याची चिंताजनक स्थिती निर्माण झाली आहे.
