‘रेड्स ॲप’च्या माध्यमातून तंत्रज्ञानाचा प्रभावी वापर; उपमुख्यमंत्री देवेंद्र फडणवीस यांच्या हस्ते सन्मान
रत्नागिरी | प्रतिनिधी :
महाराष्ट्र शासनाच्या ई-गव्हर्नन्स सुधारणा कार्यक्रमांतर्गत उल्लेखनीय कामगिरी केल्याबद्दल रत्नागिरीचे पोलीस अधीक्षक नितीन बगाटे यांना राज्याचे उपमुख्यमंत्री तथा गृहमंत्री देवेंद्र फडणवीस यांच्या हस्ते सन्मानित करण्यात आले. मुंबईतील सह्याद्री अतिथीगृह येथे आयोजित विशेष सोहळ्यात हा सन्मान प्रदान करण्यात आला.
राज्य सरकारच्या ‘१५० दिवसांच्या ई-गव्हर्नन्स सुधारणा’ मोहिमेत रत्नागिरी पोलीस दलाने तंत्रज्ञानाचा प्रभावी वापर करून प्रशासकीय कामकाजात पारदर्शकता आणि गती आणण्यात यश मिळवले आहे. विशेषतः नितीन बगाटे यांच्या संकल्पनेतून विकसित करण्यात आलेल्या ‘रेड्स ॲप’ (REDS – Ratnagiri E-Detection System) या अभिनव उपक्रमाची राज्यस्तरावर विशेष दखल घेण्यात आली.
हे ‘रेड्स ॲप’ कृत्रिम बुद्धिमत्ता (AI) तंत्रज्ञानाच्या साहाय्याने गुन्हेगारांचा शोध घेणे तसेच अज्ञात मृतदेहांची ओळख पटविण्यास पोलिसांना मदत करते. या आधुनिक प्रणालीमुळे गुन्ह्यांची उकल अधिक जलद, अचूक आणि सुलभ झाली असल्याचे सांगण्यात येत आहे.
या सन्मानाबद्दल बोलताना देवेंद्र फडणवीस यांनी रत्नागिरी पोलिसांच्या डिजिटल उपक्रमांचे कौतुक करत, अशा तंत्रज्ञानाधारित प्रयोगांमुळे गुन्हेगारीवर नियंत्रण मिळवण्यास मोठी मदत होईल, असा विश्वास व्यक्त केला.
दरम्यान, पोलीस अधीक्षक नितीन बगाटे यांनी हा सन्मान रत्नागिरी पोलीस दलातील सर्व अधिकारी व कर्मचाऱ्यांच्या सामूहिक प्रयत्नांचे फलित असल्याचे नमूद केले. या उल्लेखनीय कामगिरीमुळे रत्नागिरी पोलीस दलावर सर्व स्तरांतून अभिनंदनाचा वर्षाव होत आहे.
