सेलू प्रतिनिधी :
केळझर शिवारात विरुद्ध दिशेने येणाऱ्या एसटी बसने दुचाकीला जोरदार धडक दिल्याने भीषण अपघात झाला असून दुचाकी चालक गंभीर जखमी झाला. ही घटना रविवार (ता. २९) रोजी सकाळी सुमारे १२ वाजता सुनीता नर्सिंग कॉलेजजवळ घडली.
प्राप्त माहितीनुसार, नागपूरकडून वर्धेकडे जाणारी एसटी बस (क्रमांक MH 49 BZ 8357) केळझरजवळ आली असता, बसचालक अमोल राऊत यांनी वाहन विरुद्ध दिशेला नेल्याने समोरून येणाऱ्या दुचाकीला धडक दिली.
या अपघातात एमएच 32 AZ 6573 क्रमांकाच्या दुचाकीवरील चालक अलगारस्वामी मुरुगेसन (मुळगाव तामिळनाडू, सध्या मुक्काम बोरगाव मेघे) याच्या हात व पायाला गंभीर दुखापत झाली.
अपघातानंतर तातडीने मदतकार्य :
घटनेची माहिती मिळताच रुग्णमित्र प्रज्वल लटारे यांनी घटनास्थळी धाव घेऊन जखमीला सेलू येथील रुग्णालयात दाखल केले, त्यानंतर पुढील उपचारासाठी नागपूर येथे हलविण्यात आले.
पोलीस कारवाई :
पोलीस पाटील प्रकाश खंडाळे यांनी घटनेची माहिती सेलू पोलीस स्टेशनला दिली. त्यानंतर पोलीस उपनिरीक्षक धनंजय पांडे, रामकिसन इप्पर व मयुरी पांचाळ यांनी घटनास्थळी पंचनामा करून पुढील तपास सुरू केला आहे.
