आजरा | प्रतिनिधी :
सार्वजनिक आरोग्य विभाग, महाराष्ट्र शासन आणि आजरा ग्रामीण रुग्णालय यांच्या संयुक्त विद्यमाने आयोजित ‘मोफत आयुष सर्व रोग निदान व उपचार शिबिरा’स रुग्णांचा उत्स्फूर्त प्रतिसाद मिळाला. या शिबिरात एकूण ४१५ रुग्णांनी नोंदणी करून तज्ज्ञ डॉक्टरांकडून उपचार व मार्गदर्शन घेतले.
शिबिराचे उद्घाटन जिल्हा शल्यचिकित्सक डॉ. प्रशांत वाडीकर यांच्या हस्ते झाले. बदलत्या जीवनशैलीत आयुष उपचार पद्धतीचे महत्त्व त्यांनी यावेळी अधोरेखित केले. कार्यक्रमाच्या अध्यक्षस्थानी नगराध्यक्ष अशोक चराटी होते.
शिबिरादरम्यान आयुर्वेद व होमिओपॅथी विषयावर तज्ज्ञ डॉक्टरांनी मार्गदर्शन केले. डॉ. श्रद्धाआनंद ठाकूर यांनी आयुर्वेदाचे महत्त्व, डॉ. अंजली देशपांडे यांनी दैनंदिन जीवनातील आयुर्वेद, तर डॉ. सागर साव्यानावर यांनी होमिओपॅथी उपचार पद्धतीचे फायदे स्पष्ट केले.
या प्रसंगी कोल्हापूर आरोग्य व कुटुंब कल्याण केंद्राच्या उपप्राचार्य डॉ. वाडीकर मॅडम, आमदार प्रतिनिधी विजय थोरवत, उपनगराध्यक्ष पूजा डोंगरे, जिल्हा आयुष अधिकारी डॉ. लादे तसेच डीपीएम आयुष डॉ. शेवाळे यांची उपस्थिती होती.
कार्यक्रमाचे प्रास्ताविक वैद्यकीय अधीक्षक डॉ. अमोल पाटील यांनी केले, तर आभार प्रदर्शन डॉ. सुरजीत पांडव यांनी केले. शिबिरात डॉ. सुनील हसूरे, डॉ. प्रशांत चौगुले, डॉ. स्वाती पाटील, डॉ. सागर तेउरवाडकर आणि डॉ. स्वाती रेडेकर यांनी रुग्ण तपासणी करून औषधोपचार दिले.
ग्रामीण भागातील नागरिकांसाठी राबवण्यात आलेल्या या उपक्रमामुळे परिसरात समाधान व्यक्त होत आहे.
