आजरा | प्रतिनिधी :
आजरा येथील स्टेट बँक शाखेमधील ग्राहकांना मिळणारी उध्दट वागणूक व विविध गैरसोयींच्या पार्श्वभूमीवर अन्याय निवारण समितीने आक्रमक भूमिका घेत हस्तक्षेप केल्यानंतर बँक प्रशासनाने नमते घेत कामकाजात तातडीने सुधारणा करण्याचे आश्वासन दिले आहे.
गेल्या काही दिवसांपासून शाखेतील कर्मचाऱ्यांचे उध्दट वर्तन, कागदपत्रांच्या नावाखाली ग्राहकांना वारंवार हेलपाटे मारण्यास भाग पाडणे, तसेच सेवेतील विलंब यामुळे ग्राहक त्रस्त झाले होते. विशेषतः ग्रामीण भागातील वयोवृद्ध नागरिकांना रांगेत उभे राहणे व क्लिष्ट फॉर्म भरणे कठीण जात होते. बँकेत प्रवेश करताना चप्पल बाहेर काढण्याची सक्ती केल्याने ग्राहकांमध्ये नाराजी निर्माण झाली होती.
या तक्रारींची दखल घेत अन्याय निवारण समितीच्या प्रतिनिधींनी बँक व्यवस्थापनाशी चर्चा करून ठोस उपाययोजनांची मागणी केली. यावेळी नगरसेवक परशुराम बामणे, डॉ. श्रदानंद ठाकुर, दिनकर जाधव, जावेद पठाण, बंडोपंत चव्हाण, जोतीबा आजगेकर व मिनीन डिसोझा आदी उपस्थित होते.
चर्चेनंतर बँक व्यवस्थापनाने मराठी व इंग्रजी भाषेत स्लिप भरण्याची सुविधा उपलब्ध करून देणे, चप्पल काढण्याची सक्ती रद्द करणे, ग्राहकांशी सौजन्यपूर्ण वर्तन करण्याच्या सूचना देणे तसेच रांग व्यवस्थेत सुधारणा करण्याचे आश्वासन दिले.
समितीच्या या हस्तक्षेपामुळे ग्राहकांमध्ये समाधानाचे वातावरण निर्माण झाले असून, बँकेच्या कामकाजात सकारात्मक बदल होण्याची अपेक्षा व्यक्त होत आहे.
