चंदगड | प्रतिनिधी :
चंदगड तालुक्यातील इसापूर, मिरवेल, पारगड आणि नामखोल या दुर्गम भागांमध्ये गॅस सिलिंडर बुकिंगसाठी आवश्यक असलेल्या ओटीपी प्रणालीमुळे नागरिकांना मोठ्या अडचणींचा सामना करावा लागत आहे. मोबाईल नेटवर्क आणि वीज पुरवठ्याच्या समस्येमुळे अनेक ग्राहकांना ओटीपी मिळत नसल्याने गॅस बुकिंग करणे कठीण झाले आहे.
या भागात वेणूगोपाल गॅस एजन्सीचे मोठ्या संख्येने ग्राहक असून, केंद्र सरकारच्या नियमानुसार ऑनलाइन बुकिंग व ओटीपी अनिवार्य करण्यात आला आहे. मात्र, डोंगराळ व दुर्गम भौगोलिक परिस्थितीमुळे येथे मोबाईल नेटवर्क अत्यंत कमी असून वारंवार वीजपुरवठाही खंडित होत असल्याने मोबाईल टॉवर बंद पडतात. परिणामी ग्राहकांना ओटीपी मिळत नाही आणि गॅस नोंदणी प्रक्रिया अडथळ्यात येते.
ही समस्या लक्षात घेऊन इसापूर ग्रामपंचायत तसेच मिरवेल-पारगड-नामखोल समूह ग्रामपंचायतींनी गॅस एजन्सी व्यवस्थापकांना लेखी निवेदन देत ऑनलाइन बुकिंगची अट शिथिल करण्याची मागणी केली आहे.
ग्रामपंचायतींच्या पत्रात दुर्गम भागातील परिस्थिती लक्षात घेऊन गॅस वितरण ऑफलाइन पद्धतीने करण्याची विनंती करण्यात आली आहे, जेणेकरून नागरिकांची गैरसोय टाळता येईल आणि गॅस पुरवठा सुरळीत राहील.
दरम्यान, या मागणीवर गॅस एजन्सी व संबंधित प्रशासन काय निर्णय घेणार, याकडे परिसरातील नागरिकांचे लक्ष लागले आहे.
