धाराशिव (प्रतिनिधी): धाराशिव (उस्मानाबाद) येथे सुरू असलेल्या SIR मोहिमेतील कामकाजावर नाराजी व्यक्त करत नगरसेवक अजहर मुजावर आणि नगरसेवक इस्माईल शेख यांनी उपविभागीय अधिकारी तसेच नायब तहसीलदार यांची भेट घेऊन तक्रार नोंदवली.
या भेटीत SIR मोहिमेअंतर्गत कार्यरत असलेल्या BLO (Booth Level Officer) यांच्या कामकाजाबाबत गंभीर प्रश्न उपस्थित करण्यात आले. अनेक ठिकाणी कामात हलगर्जीपणा होत असून नागरिकांना त्रास सहन करावा लागत असल्याचे नगरसेवकांनी अधिकाऱ्यांच्या निदर्शनास आणून दिले.
तसेच जे BLO आपले काम योग्य पद्धतीने पार पाडत नाहीत, त्यांच्यावर कठोर कारवाई करण्यात यावी, अशी मागणीही यावेळी करण्यात आली. प्रशासनाने या प्रकरणाकडे गांभीर्याने लक्ष देऊन तात्काळ सुधारात्मक उपाययोजना कराव्यात, असेही त्यांनी स्पष्ट केले.
दरम्यान, संबंधित अधिकाऱ्यांनी या तक्रारीची दखल घेत आवश्यक ती कारवाई करण्यात येईल, असे आश्वासन दिले आहे.
