कंधार, दि. ०४ (प्रतिनिधी) : कंधार तालुक्यातील फुलवळ येथे अत्यंत हृदयद्रावक घटना घडली असून मुलाच्या मृत्यूच्या केवळ चार तासांतच वडिलांचाही मृत्यू झाल्याने संपूर्ण गाव शोकसागरात बुडाले आहे. दोघांवर एकाच वेळी अंत्यसंस्कार करण्यात आल्याने परिसरात हळहळ व्यक्त केली जात आहे.
फुलवळ येथील हुसेन काशीम निचलकर (वय ४३) यांचे अल्पशा आजाराने बुधवार, दि. १ एप्रिल रोजी दुपारी २ वाजता दुःखद निधन झाले. ते गेल्या काही दिवसांपासून आजारी होते व त्यांच्यावर उपचार सुरू होते. आर्थिक परिस्थिती अत्यंत हलाखीची असूनही ते कुटुंबाचा उदरनिर्वाह करण्यासाठी रात्रंदिवस काबाडकष्ट करत होते.
मुलाच्या निधनाची बातमी कळताच वडील काशीम लालासाब निचलकर (वय ७०) यांना मोठा मानसिक धक्का बसला. मुलाच्या विरहाचे दुःख सहन न झाल्याने अवघ्या चार तासांतच म्हणजे सायंकाळी सुमारे ६ वाजता त्यांचेही निधन झाले.
या दुहेरी दुःखद घटनेमुळे निचलकर कुटुंबावर मोठे संकट कोसळले आहे. त्यांच्या पश्चात आई, पत्नी, दोन मुले, एक सून आणि दोन बहिणी असा परिवार आहे. कुटुंबाची परिस्थिती हालाखीची असल्याने राजकीय, सामाजिक कार्यकर्ते व सेवाभावी संस्थांनी पुढाकार घेऊन मदत करावी, अशी मागणी स्थानिक नागरिकांकडून होत आहे.
रात्री उशिरा फुलवळ येथे बाप-लेकावर हजारो नागरिकांच्या उपस्थितीत एकाच वेळी अंत्यसंस्कार करण्यात आले. या घटनेमुळे संपूर्ण गावात शोककळा पसरली असून सर्वत्र हळहळ व्यक्त केली जात आहे.
