परभणी (प्रतिनिधी) : पोलीस दलात तब्बल ३८ वर्षांहून अधिक काळ प्रामाणिक व कर्तव्यनिष्ठ सेवा बजावणारे प्रकाश निळकंठराव कुकडे यांचा सेवापूर्ती सोहळा उत्साहात पार पडला. शिपाई पदापासून सुरुवात करत पोलीस उपनिरीक्षक (PSI) पदापर्यंतचा त्यांचा प्रवास अनेकांसाठी प्रेरणादायी ठरला आहे.
मालेवाडी (ता. गंगाखेड, जि. परभणी) येथील साध्या कुटुंबातून आलेल्या कुकडे यांनी कठोर परिश्रम आणि जिद्दीच्या जोरावर पोलीस भरतीत यश मिळवले. सेवाकाळात त्यांनी ट्रॅफिक पोलीस, आर्थिक गुन्हे शाखा तसेच महामार्ग सुरक्षा विभागातही उल्लेखनीय कामगिरी बजावली. सेलू, जिंतूर, मानवत आणि परभणी या ठिकाणी त्यांनी विविध जबाबदाऱ्या समर्थपणे पार पाडल्या.
दि. १ जानेवारी २०१७ रोजी त्यांना पदोन्नती मिळून पोलीस उपनिरीक्षक पदावर नियुक्ती झाली. उत्कृष्ट सेवेसाठी त्यांना २०१८ मध्ये पोलीस महासंचालकांकडून गुणवत्तापूर्वक सेवा पदकाने गौरविण्यात आले.
शिस्तप्रिय, प्रामाणिक आणि धैर्यशील अधिकारी म्हणून ओळख निर्माण केलेल्या कुकडे यांनी आपल्या ३८ वर्षे ३ महिन्यांच्या सेवेत कर्तव्यनिष्ठेचा आदर्श घालून दिला. त्यांच्या सेवापूर्ती निमित्त सहकारी व मान्यवरांनी त्यांच्या कार्याचा गौरव करत पुढील आयुष्यासाठी शुभेच्छा दिल्या.
यावेळी “सेवा, शिस्त आणि समर्पणभाव” या मूल्यांमुळेच कुकडे यांचे कार्य सर्वांसाठी प्रेरणादायी ठरले असल्याचे मत व्यक्त करण्यात आले. त्यांच्या अनुभवाचा समाजाला पुढेही लाभ व्हावा, अशी अपेक्षा व्यक्त करण्यात आली.
