जाखमाता देवी चषक २०२६ स्पर्धेत न्यू होप लोणवडी विजेता; अनिकेत रांगले मालिकावीर

विरार | प्रतिनिधी:
साईकृपा क्रिकेट संघ, बोरथळ यांच्या वतीने आयोजित स्वयंभू श्री जाखमाता देवी चषक – २०२६ स्पर्धा दि. ५ एप्रिल रोजी विरार येथील कोपरी, श्री सत्यनारायण स्पोर्ट्स क्लब मैदानावर उत्साहात पार पडली. या स्पर्धेत न्यू होप क्रिकेट संघ, लोणवडी यांनी दमदार कामगिरी करत विजेतेपद पटकावले.

अंतिम सामन्यात न्यू होप संघाने त्रिमूर्ती क्रिकेट संघ (शिवाजी नगर, आडे) यांचा पराभव केला. त्रिमूर्ती संघाने दिलेल्या ३१ धावांच्या लक्ष्याचा पाठलाग करताना न्यू होपच्या सलामीवीर अनिकेत रांगले आणि उमेश रहाटवळ यांनी आक्रमक फलंदाजी करत चौकार-षटकारांची आतषबाजी केली. त्यांच्या प्रभावी खेळीमुळे सामना एकतर्फी झाला आणि न्यू होप संघाने सहज विजय मिळवत चषकावर आपले नाव कोरले.

स्पर्धेत न्यू होप क्रिकेट संघ, लोणवडी विजेता ठरला, तर त्रिमूर्ती क्रिकेट संघ (शिवाजी नगर, आडे) उपविजेता ठरला. तृतीय क्रमांक श्री कालभैरव क्रिकेट संघ, केळशी (नवानगर) यांनी पटकावला.

वैयक्तिक पुरस्कारांमध्ये उत्कृष्ट फलंदाज म्हणून अमित चिमण, उत्कृष्ट गोलंदाज म्हणून युग मिसाळ यांना गौरविण्यात आले. संपूर्ण स्पर्धेत शानदार कामगिरी करणाऱ्या अनिकेत रांगले याने मालिकावीर (Man of the Series) पुरस्कार पटकावला. अंतिम सामन्यातही त्याने Man of the Match पुरस्कार मिळवत संघाच्या विजयात मोलाची भूमिका बजावली. सेमी फायनलमध्ये उमेश रहाटवळ याने निर्णायक खेळी करत संघाला अंतिम फेरीत पोहोचवले होते.

क्वार्टर फायनलमध्ये अनिकेत रांगले याने केवळ ९ चेंडूत ४० धावा करत प्रेक्षकांची मने जिंकली. अनिकेत आणि उमेश यांच्या जोडीने संपूर्ण स्पर्धेत वर्चस्व गाजवत क्रिकेटप्रेमींना रोमांचित केले.

स्पर्धेच्या यशस्वी आयोजनासाठी पवई पंचक्रोशी क्रीडा समिती, दापोली (रत्नागिरी), पंच पॅनल तसेच समालोचक कल्पेश मालवे आणि दीपक कोकरे यांचे विशेष योगदान लाभले.

एकूणच, या स्पर्धेमुळे स्थानिक क्रिकेटला नवी उंची मिळाली असून खेळाडूंच्या गुणवत्तेला उत्तम व्यासपीठ मिळाल्याचे चित्र पाहायला मिळाले.