बातमी :
जत (प्रतिनिधी – अरुण कोळी) : जत शहरातील राज्य व राष्ट्रीय महामार्गांलगत व्यवसाय करणाऱ्या खोकीधारकांचा प्रश्न सोडवावा, अशी मागणी भा.ज.पा. युवानेते व सामाजिक कार्यकर्ते चंद्रकांत उर्फ पापा कुंभार यांनी Gopichand Padalkar यांच्याकडे केली आहे.
कुंभार यांनी सांगितले की, जत-अथणी राज्य मार्ग तसेच प्रशासकीय भवनासमोरील ईश्वरपूर-चडचण राष्ट्रीय महामार्गावर अनेक वर्षांपासून खोकीधारक आपला व्यवसाय करत आहेत. मात्र, ही खोकी रस्त्यालगत असल्याने बांधकाम विभाग, जत नगरपरिषद आणि प्रशासनाकडून वारंवार अतिक्रमण हटविण्याच्या नोटिसा दिल्या जात आहेत. यामुळे खोकीधारक त्रस्त झाले असून त्यांच्या उदरनिर्वाहाचा प्रश्न निर्माण झाला आहे.
या पार्श्वभूमीवर आ. पडळकर यांनी यापूर्वी खोकीधारक व प्रशासन यांच्यात मध्यस्थी करण्याचा प्रयत्न केला होता. मात्र, रस्ते रुंदीकरण आणि वाहतुकीच्या अडथळ्यांमुळे निर्णय घेणे कठीण झाले आहे. एकीकडे खोकीधारकांचा व्यवसाय आणि दुसरीकडे महामार्ग विकासाची गरज यामुळे हा प्रश्न गुंतागुंतीचा बनला आहे.
दरम्यान, या समस्येवर कायमस्वरूपी तोडगा म्हणून आ. पडळकर यांनी महत्त्वाचा प्रस्ताव पुढे आणला आहे. छत्रपती संभाजी महाराज चौक ते लोखंडी पूल या मार्गावरील सर्व खोकी व दुकानदारांसाठी जत नगरपरिषद व नगरविकास मंत्रालयाच्या माध्यमातून शॉपिंग कॉम्प्लेक्स उभारण्याचा प्रस्ताव आहे. या कॉम्प्लेक्समधील गाळे भाडे तत्वावर व्यवसायिकांना देण्यात येणार असून, त्यामुळे शहराच्या सौंदर्यात भर पडण्याबरोबरच नगरपरिषदेला उत्पन्नही मिळणार आहे.
तसेच, प्रशासकीय भवनासमोरील राष्ट्रीय महामार्गावरील खोकीधारकांसाठी जिल्हा परिषदेकडील जागेवर दुकानगाळे उभारण्याचा प्रयत्न सुरू असल्याची माहितीही देण्यात आली आहे.
सध्या महामार्ग रुंदीकरणाचे काम कधीही सुरू होण्याची शक्यता असल्याने प्रशासनाकडून अतिक्रमण हटविण्याच्या नोटिसा दिल्या जात आहेत. शिवाय, महावितरण कंपनीकडून विजपुरवठा खंडित करण्याच्या कारवाईमुळे खोकीधारक अधिकच अडचणीत आले आहेत. या सर्व परिस्थितीत खोकीधारकांना दिलासा देण्यासाठी तातडीने ठोस निर्णय घेण्याची गरज असल्याचे कुंभार यांनी नमूद केले आहे.
