श्रीगोंदा (प्रतिनिधी) :
श्रीगोंदा शहरातील सिद्धार्थनगर येथे येत्या १ मे रोजी बौद्ध पौर्णिमेनिमित्त भव्य धम्म यात्रा तसेच सामुदायिक विवाह सोहळ्याचे आयोजन करण्यात आले आहे. दरवर्षीप्रमाणे यंदाही हा उपक्रम मोठ्या उत्साहात पार पडणार असल्याची माहिती संयोजकांनी दिली.
या कार्यक्रमाच्या नियोजनासाठी सिद्धार्थनगर येथे कार्यकर्त्यांची बैठक घेण्यात आली. यावेळी नवीन सोहळा समिती गठित करण्यात आली असून अध्यक्षपदी शिवा भानुदास घोडके, कार्याध्यक्षपदी भारत सखाराम घोडके, उपाध्यक्षपदी शशी घोडके, खजिनदारपदी जिवाजीराव घोडके, सहखजिनदारपदी आनंद घोडके आणि स्वागताध्यक्षपदी गोरख घोडके यांची निवड करण्यात आली.
स्वागताध्यक्ष गोरख घोडके यांनी सांगितले की, “गेल्या ४० वर्षांपासून समाजात सामुदायिक विवाहाची प्रेरणादायी परंपरा सुरू आहे. या माध्यमातून अनेक कुटुंबांनी आपल्या मुला-मुलींचे विवाह साधेपणाने व आनंदात लावले आहेत.” आतापर्यंत सुमारे ५०० ते ६०० विवाह या उपक्रमातून पार पडले असून समाजातील एकोपा आणि सहकार्याचे हे उत्तम उदाहरण ठरले आहे.
सामुदायिक विवाहामुळे अनावश्यक खर्चाला आळा बसतो, गरीब व मध्यमवर्गीय कुटुंबांना आर्थिक दिलासा मिळतो तसेच समाजात बंधुभाव आणि एकजूट वाढते, असे मत उपस्थितांनी व्यक्त केले.
या परंपरेच्या जडणघडणीत मल्हारराव घोडके, भानुदास घोडके, जालिंदर घोडके, गंगाराम घोडके पाटील, भागचंद घोडके, अर्जुन घोडके आणि गौतमराव घोडके यांसारख्या ज्येष्ठांचे मोलाचे योगदान असल्याचे यावेळी नमूद करण्यात आले.
📅 कार्यक्रमाचे स्वरूप
१ मे रोजी सकाळी ध्वजारोहण, सायंकाळी भव्य शोभायात्रा आणि त्यानंतर सामुदायिक विवाह सोहळा पार पडणार आहे. या उपक्रमासाठी तालुका व जिल्ह्यातील भीम अनुयायी व कार्यकर्त्यांनी मोठ्या संख्येने सहभागी व्हावे, असे आवाहन करण्यात आले आहे.
