📰 शिरूर नगरपरिषदेच्या प्रस्तावित हद्दवाढीच्या ठरावावर फेरविचाराची मागणी; भूमिपुत्र प्रतिष्ठाणचे नगराध्यक्षांना निवेदन

प्रतिनिधी | शिरूर

शिरूर नगरपरिषदेच्या सर्वसाधारण सभेत दि. १७ जुलै २०२६ रोजी मंजूर करण्यात आलेल्या प्रस्तावित हद्दवाढीच्या ठरावावर फेरविचार करण्यात यावा, अशी मागणी भूमिपुत्र प्रतिष्ठाणचे संस्थापक अध्यक्ष सुशांत किशोर कुटे यांनी शिरूर नगरपरिषदेच्या नगराध्यक्षा सौ. ऐश्वर्याताई अभिजीत पाचर्णे यांना दिलेल्या निवेदनाद्वारे केली आहे.

निवेदनात नमूद करण्यात आले आहे की, नगरपरिषदेच्या सर्वसाधारण सभेतील ठराव क्रमांक २२ द्वारे प्रस्तावित हद्दवाढीचा ठराव मंजूर करण्यात आला. मात्र, शिरूर शहराची भौगोलिक रचना, सध्याची लोकसंख्या आणि उपलब्ध नागरी सुविधा लक्षात घेता नगरपरिषद अद्यापही सर्व नागरिकांना आवश्यक त्या मूलभूत सुविधा प्रभावीपणे उपलब्ध करून देण्यासाठी तसेच प्रस्तावित हद्दवाढीनंतर वाढणारा विकासाचा आर्थिक भार उचलण्यासाठी पूर्णपणे सक्षम नसल्याचे मत भूमिपुत्र प्रतिष्ठाणने व्यक्त केले आहे.

निवेदनात पुढे म्हटले आहे की, इतक्या महत्त्वाच्या विषयावर निर्णय घेण्यापूर्वी शहरातील विविध क्षेत्रांतील प्रतिष्ठित व्यक्ती, सामाजिक संघटना, नागरिक आणि संबंधित घटकांशी सविस्तर चर्चा व विचारविनिमय होणे आवश्यक होते. सर्व संबंधितांची मते जाणून घेतल्यानंतरच अशा स्वरूपाचा ठराव मंजूर करण्यात यायला हवा होता, असेही निवेदनात नमूद करण्यात आले आहे.

शिरूरच्या प्रथम नागरिक या नात्याने शहरवासीयांच्या भावना लक्षात घेऊन प्रस्तावित हद्दवाढीच्या ठरावाच्या मंजुरीचा पुनर्विचार करून फेरविचाराची प्रक्रिया सुरू करावी, अशी विनंती भूमिपुत्र प्रतिष्ठाणच्या वतीने नगराध्यक्षा सौ. ऐश्वर्याताई अभिजीत पाचर्णे यांच्याकडे करण्यात आली आहे.

शिरूरकरांच्या भावना आणि शहराच्या भविष्यातील विकासाचा विचार करून या विषयावर सकारात्मक निर्णय घेतला जाईल, असा विश्वास भूमिपुत्र प्रतिष्ठाणचे संस्थापक अध्यक्ष सुशांत किशोर कुटे यांनी आपल्या निवेदनातून व्यक्त केला आहे.