📰 शिरूर नगरपरिषदेच्या प्रस्तावित हद्दवाढीच्या ठरावावर फेरविचाराची मागणी; भूमिपुत्र प्रतिष्ठाणचे नगराध्यक्षांना निवेदन

शिरूर | प्रतिनिधी

शिरूर नगरपरिषदेच्या सर्वसाधारण सभेत १७ जुलै २०२६ रोजी मंजूर करण्यात आलेल्या प्रस्तावित हद्दवाढीच्या ठरावावर फेरविचार करण्यात यावा, अशी मागणी भूमिपुत्र प्रतिष्ठाणचे संस्थापक अध्यक्ष सुशांत किशोर कुटे यांनी नगराध्यक्षा सौ. ऐश्वर्याताई अभिजीत पाचर्णे यांना निवेदनाद्वारे केली आहे.

निवेदनानुसार, नगरपरिषदेच्या सर्वसाधारण सभेतील ठराव क्रमांक २२ अंतर्गत प्रस्तावित हद्दवाढीचा निर्णय मंजूर करण्यात आला. मात्र, शिरूर शहराची सध्याची भौगोलिक परिस्थिती, लोकसंख्या आणि उपलब्ध नागरी सुविधा लक्षात घेता नगरपरिषद अद्याप सर्व नागरिकांना प्रभावीपणे मूलभूत सुविधा पुरविण्यास सक्षम नसल्याचे मत भूमिपुत्र प्रतिष्ठाणने व्यक्त केले आहे. तसेच, प्रस्तावित हद्दवाढीनंतर विकासकामांचा वाढणारा आर्थिक भार पेलण्याबाबतही चिंता व्यक्त करण्यात आली आहे.

या निवेदनात इतक्या महत्त्वाच्या विषयावर निर्णय घेण्यापूर्वी शहरातील विविध सामाजिक संघटना, प्रतिष्ठित नागरिक, तज्ज्ञ आणि संबंधित घटकांशी व्यापक चर्चा व विचारविनिमय होणे आवश्यक होते, असे नमूद करण्यात आले आहे. सर्व संबंधितांचे मत जाणून घेतल्यानंतरच अशा स्वरूपाचा ठराव मंजूर व्हायला हवा होता, असेही निवेदनात म्हटले आहे.

शहराच्या प्रथम नागरिक या नात्याने नगराध्यक्षा सौ. ऐश्वर्याताई अभिजीत पाचर्णे यांनी नागरिकांच्या भावना लक्षात घेऊन प्रस्तावित हद्दवाढीच्या ठरावाचा पुनर्विचार करून फेरविचाराची प्रक्रिया सुरू करावी, अशी मागणी भूमिपुत्र प्रतिष्ठाणच्या वतीने करण्यात आली आहे.

शहराच्या भविष्यातील विकासाचा आणि नागरिकांच्या हिताचा विचार करून या विषयावर सकारात्मक निर्णय घेतला जाईल, असा विश्वास संस्थापक अध्यक्ष सुशांत किशोर कुटे यांनी व्यक्त केला आहे.