सांगली | प्रतिनिधी
सांगली शहरातील बहुप्रतीक्षित वारणाली मल्टीस्पेशालिटी हॉस्पिटल महापालिकेच्या माध्यमातूनच सुरू करण्याचा महत्त्वपूर्ण निर्णय महासभेत घेण्यात आला. नागरिकांना दर्जेदार, परवडणारी आणि आधुनिक आरोग्यसेवा उपलब्ध करून देण्याच्या उद्देशाने हा निर्णय घेण्यात आला असून, हॉस्पिटल कार्यान्वित करण्यासाठी आवश्यक असलेल्या १०८ पदांना मंजुरी देण्यासाठी शासनाकडे पाठपुरावा करण्याचे आवाहन महापौर धीरज सूर्यवंशी यांनी जिल्ह्यातील सर्व आमदारांना केले आहे.
महासभेतील चर्चेदरम्यान वारणाली हॉस्पिटल खासगी संस्थेकडे न देता महापालिकेनेच चालविण्याचा निर्णय कायम ठेवण्यात आला. तसेच हॉस्पिटल सुरू करण्यासाठी आवश्यक निधी, मनुष्यबळ आणि प्रशासकीय प्रक्रिया पूर्ण करण्यासाठी शासनाकडे सातत्याने पाठपुरावा करण्याचेही निश्चित करण्यात आले.
महापौर धीरज सूर्यवंशी यांनी सांगितले की, शासनाकडून १०८ पदांना मंजुरी मिळाल्यानंतर भरती प्रक्रिया पूर्ण करून हॉस्पिटल लवकरात लवकर सुरू करता येईल. त्यामुळे सांगली शहरासह परिसरातील हजारो नागरिकांना आधुनिक आणि परवडणारी आरोग्यसेवा उपलब्ध होईल, असा विश्वास त्यांनी व्यक्त केला.
महासभेत सर्व लोकप्रतिनिधींनी वारणाली हॉस्पिटल लवकर सुरू करण्यासाठी एकत्रित प्रयत्न करण्याची गरज व्यक्त केली. शहराच्या आरोग्य सुविधांमध्ये भर घालणारा हा प्रकल्प लवकर कार्यान्वित व्हावा, अशी अपेक्षाही यावेळी व्यक्त करण्यात आली.
सांगलीकरांच्या आरोग्याच्या दृष्टीने महत्त्वपूर्ण असलेल्या या प्रकल्पाकडे आता नागरिकांसह सर्वांचे लक्ष लागले असून, शासनाच्या पुढील निर्णयाची प्रतीक्षा आहे.
