वरोरा (प्रतिनिधी) – जनतेच्या प्रश्नांसाठी आयुष्यभर झटणारे, गरिबांचे आधारवड ठरलेले लोकनेते तथा माजी मंत्री संजय देवतळे यांच्या स्मृतीदिनानिमित्त २५ एप्रिल २०२६ रोजी वरोरा येथे भव्य नि:शुल्क सर्व रोगनिदान व रक्तदान शिबिराचे आयोजन करण्यात आले आहे. या उपक्रमातून हजारो नागरिकांना मोफत व दर्जेदार आरोग्यसेवा उपलब्ध होणार आहे.
स्व. देवतळे यांनी आपल्या कार्यकाळात वंचित, दुर्लक्षित आणि गरजू घटकांसाठी उल्लेखनीय कार्य केले होते. त्यांच्या सेवाभावी कार्याला अभिवादन म्हणून आयोजित या शिबिरातून “सेवाच खरा धर्म” हा संदेश अधिक दृढ होत आहे.
या शिबिरामध्ये मधुमेह, रक्तदाब व हृदयविकार तपासणी, स्तन व गर्भाशय कर्करोग निदान, मोतीबिंदू तपासणी व शस्त्रक्रिया, हर्निया तसेच इतर आजारांचे निदान, ईसीजी व विविध रक्त तपासण्या पूर्णपणे मोफत करण्यात येणार आहेत. याशिवाय भव्य रक्तदान शिबिर, आयुष्यमान कार्ड वितरण आणि विविध शासकीय आरोग्य योजनांची माहिती नागरिकांना दिली जाणार आहे.
सदर शिबिर २५ एप्रिल रोजी उपजिल्हा ग्रामीण रुग्णालय, वरोरा (जि. चंद्रपूर) येथे सकाळी ९ ते दुपारी २ या वेळेत पार पडणार आहे. या उपक्रमाचे विनीत आमदार करण संजय देवतळे असून, स्व. संजय देवतळे मित्र परिवार आणि उपजिल्हा रुग्णालय, वरोरा यांच्या संयुक्त विद्यमाने आयोजन करण्यात आले आहे.
नागरिकांनी मोठ्या संख्येने उपस्थित राहून या मोफत आरोग्य व रक्तदान शिबिराचा लाभ घ्यावा, असे आवाहन आयोजकांकडून करण्यात आले आहे.
