माजी विद्यार्थ्याची देणगी; चंदगडमध्ये प्रेरणादायी उपक्रम
चंदगड (प्रतिनिधी) – न. भु. पाटील ज्युनिअर कॉलेज, चंदगड येथे आयोजित कार्यक्रमात माजी विद्यार्थी तथा रजिस्टर ऑफ कंपनीज अँड जॉईंट डायरेक्टर म्हणून कार्यरत असलेले शामराव पाटील यांनी विद्यार्थ्यांना प्रेरणादायी मार्गदर्शन करत जीवशास्त्र प्रयोगशाळेच्या इमारतीसाठी १ लाख २५ हजार रुपयांची देणगी दिली.
कार्यक्रमाचे प्रास्ताविक प्राचार्य आर. पी. पाटील यांनी केले, तर माजी प्राचार्य एस. व्ही. गुरबे यांनी पाहुण्यांचा परिचय करून दिला. यावेळी शामराव पाटील व सौ. सुनिता पाटील यांचा मान्यवरांच्या हस्ते सत्कार करण्यात आला. कार्यक्रमाच्या अध्यक्षस्थानी संस्थेचे संचालक प्रा. आर. पी. पाटील होते.
विद्यार्थ्यांना मार्गदर्शन करताना शामराव पाटील म्हणाले, “आपल्यातील क्षमता ओळखा, परिस्थितीची जाणीव ठेवा आणि कष्ट करण्याची तयारी ठेवा. सतत शिकत राहिल्याने प्रगतीची दारे खुली होतात. स्वयंअध्ययनामुळे यशाचा मार्ग अधिक सुकर होतो.” उच्च पदावर कार्यरत असलेले माजी विद्यार्थी म्हणून त्यांचे उदाहरण विद्यार्थ्यांसाठी प्रेरणादायी ठरले.
संस्थेचे ऑडिटर प्रा. एन. एस. पाटील यांनी “माजी विद्यार्थ्यांनी समाजाप्रती असलेली जबाबदारी ओळखून योगदान देणे आवश्यक आहे,” असे मत व्यक्त केले. अध्यक्षीय भाषणात प्रा. आर. पी. पाटील यांनी “करिअरमध्ये वेगळे मार्ग शोधा, आपल्या भागातील विद्यार्थ्यांमध्ये प्रचंड क्षमता आहे,” असे सांगत विद्यार्थ्यांना प्रेरित केले.
कार्यक्रमाला उपाध्यक्ष एल. डी. कांबळे, खजिनदार ए. व्ही. सुतार, उपप्राचार्य व्ही. एन. कांबळे यांच्यासह शिक्षक व विद्यार्थी मोठ्या संख्येने उपस्थित होते. कार्यक्रमाचे सूत्रसंचालन प्रा. अर्चना रेळेकर यांनी केले, तर आभार प्रदर्शन प्रा. एस. एम. निळकंठ यांनी मानले.
