एकल महिलांसाठी शिरूर नगरपरिषदेत नाव नोंदणी सुरू; लाभ घेण्याचे आवाहन

पुणे (प्रतिनिधी):
शिरूर नगरपरिषदेच्या महिला व बालकल्याण विभागामार्फत एकल (पतीचे/कुटुंबातील कर्त्या पुरुषाचे निधन झालेल्या) महिलांसाठी नाव नोंदणी प्रक्रिया सुरू करण्यात आली आहे. महिलांच्या आर्थिक व सामाजिक सक्षमीकरणासाठी हा उपक्रम राबविण्यात येत असून, जास्तीत जास्त महिलांनी याचा लाभ घ्यावा, असे आवाहन महिला व बालकल्याण सभापती आयेशा सय्यद यांनी केले आहे.

नगरपरिषद कार्यालयातील नवीन इमारतीत ही नोंदणी सुरू असून, शासनाच्या विविध योजनांचा लाभ मिळवून देणे हा या उपक्रमाचा मुख्य उद्देश आहे. एकल महिलांनी पुढाकार घेऊन आपली नोंदणी करून घ्यावी, असे प्रशासनाने स्पष्ट केले आहे.

आवश्यक कागदपत्रे:

• आधार कार्ड
• रेशन कार्ड
• पॅन कार्ड
• पती किंवा कुटुंबातील कर्त्या पुरुषाचा मृत्यू दाखला
• बँक पासबुक

नोंदणीची वेळ सकाळी १० ते सायंकाळी ६ वाजेपर्यंत असून, ही सेवा पूर्णपणे विनाशुल्क आहे. अधिक माहितीसाठी DAY-NULM विभागाचे मिठ्ठू गावडे यांच्याशी संपर्क साधण्याचे आवाहन करण्यात आले आहे.

नगराध्यक्षा ऐश्वर्या अभिजित पाचर्णे, उपनगराध्यक्ष मितेश गादिया तसेच मुख्याधिकारी प्रितम पाटील यांच्या मार्गदर्शनाखाली हा उपक्रम राबविण्यात येत आहे.

या उपक्रमामुळे शहरातील गरजू एकल महिलांना शासनाच्या विविध योजनांचा लाभ मिळून त्यांच्या आर्थिक व सामाजिक सक्षमीकरणाला चालना मिळणार असल्याची अपेक्षा व्यक्त केली जात आहे.