रायगड (प्रतिनिधी):
रायगड जिल्हा परिषद, अलिबाग येथे अतिरिक्त मुख्य कार्यकारी अधिकारी (Additional CEO) पदावर डॉ. रुपाली सातपुते यांनी पदभार स्वीकारला आहे. बुधवार, दि. २२ एप्रिल २०२६ रोजी प्रभारी मुख्य कार्यकारी अधिकारी प्रियदर्शनी मोरे यांच्या हस्ते त्यांचे पुष्पगुच्छ देऊन स्वागत करण्यात आले.
डॉ. सातपुते या यापूर्वी पालघर जिल्ह्यात ग्रामीण विकास यंत्रणेच्या प्रकल्प संचालक म्हणून कार्यरत होत्या. पदभार स्विकारताना रायगड जिल्हा परिषदेत उपमुख्य कार्यकारी अधिकारी (सामान्य प्रशासन) जालिंदर पठारे तसेच विविध विभागांचे वरिष्ठ अधिकारी, कर्मचारी आणि परिचर उपस्थित होते.
पदभार स्वीकारल्यानंतर बोलताना डॉ. रुपाली सातपुते यांनी सांगितले की, रायगड जिल्ह्यातील सर्वसामान्य नागरिकांना शासकीय योजनांचा लाभ प्रभावीपणे मिळवून देण्यासाठी प्रशासन कटिबद्ध राहील. सुशिक्षित बेरोजगार तरुण, विद्यार्थिनी, महिला, ज्येष्ठ नागरिक आणि विधवा महिलांसाठी राबविण्यात येणाऱ्या विविध योजनांची अंमलबजावणी अधिक गतीने केली जाईल, असा विश्वास त्यांनी व्यक्त केला.
तसेच महिलांसाठी स्वयंरोजगार, शिवणयंत्र, गृहउद्योग तसेच एसटी पास सवलतीसारख्या योजनांचा लाभ नागरिकांपर्यंत पोहोचविण्यावर भर दिला जाईल, असेही त्यांनी स्पष्ट केले.
डॉ. सातपुते यांच्या नियुक्तीमुळे रायगड जिल्ह्यातील विकासकामांना गती मिळेल, अशी अपेक्षा व्यक्त होत असून विविध स्तरांतून त्यांचे स्वागत व अभिनंदन करण्यात येत आहे.
