नंदुरबार (प्रतिनिधी):
ऑल इंडिया मुस्लिम ओबीसी ऑर्गनायझेशनचे संस्थापक व राष्ट्रीय अध्यक्ष शब्बीर अहमद अन्सारी यांच्या निधनानंतर नंदुरबार शहरात शोक व्यक्त करण्यात आला. पवित्र शुक्रवारच्या नमाजानंतर शहरातील सर्व मशिदींमध्ये प्रार्थना, दुआ आणि मदरशांमध्ये कुराण पठण करण्यात आले.
शब्बीर अन्सारी यांनी देशभरात मुस्लिम ओबीसी समाजाच्या हक्कांसाठी सातत्याने लढा दिला होता. विविध परिषद, मोर्चे, धरणे, आमरण उपोषण आणि आंदोलनांच्या माध्यमातून त्यांनी समाजाच्या मागण्या शासनापर्यंत पोहोचवल्या. मुस्लिम ओबीसींच्या हक्कासाठी लढणारा एक अभ्यासू आणि लढवय्या नेता म्हणून त्यांची ओळख होती.
त्यांच्या निधनामुळे मुस्लिम ओबीसी चळवळीचे मोठे नुकसान झाल्याची भावना व्यक्त होत आहे. या पार्श्वभूमीवर ऑल इंडिया मुस्लिम ओबीसी ऑर्गनायझेशनचे नंदुरबार जिल्हाध्यक्ष एजाज बागवान यांच्या पुढाकाराने शहरातील मशिदी व मदरशांमध्ये विशेष प्रार्थना व कुराण पठणाचे आयोजन करण्यात आले.
यावेळी हाजी इस्माईल खाटीक, हाजी असलम चौधरी, नईम आझाद, शाकीर बागवान, शकील शाह, शकील खतिब, नासीर बागवान, जाकीर बागवान, सईद कुरेशी, अब्दुल सत्तार, जाकीर शाह, आरिफ मोमीन, सईद अन्सारी आदी मान्यवर उपस्थित होते.
शहरभरात शोकाकुल वातावरण असून, दिवंगत शब्बीर अन्सारी यांच्या कार्याची आठवण काढत त्यांना श्रद्धांजली अर्पण करण्यात येत आहे.
