विडूळ (उमरखेड) — उमरखेड तालुक्यातील विडूळ नवी आबादी येथील जिल्हा परिषद शाळेत अकोला येथील सेवा फाउंडेशन यांच्या वतीने गुणवंत विद्यार्थ्यांचा सन्मान सोहळा व निरोप समारंभ उत्साहात पार पडला. अध्यक्ष बाळासाहेब सरसमकर आणि मुख्याध्यापक गोपाल केंद्रे यांच्या उपस्थितीत झालेल्या या कार्यक्रमात विद्यार्थ्यांच्या शैक्षणिक व सांस्कृतिक कामगिरीचे कौतुक करण्यात आले.
‘शाळा वाचवा’ अभियानांतर्गत वर्षभर विविध उपक्रमांत उल्लेखनीय यश मिळवणाऱ्या विद्यार्थ्यांना बाळासाहेब सरसमकर यांच्या हस्ते गोल्ड मेडल, प्रमाणपत्रे आणि शैक्षणिक साहित्य देऊन गौरविण्यात आले. यावेळी सरसमकर यांनी विद्यार्थ्यांना पालकांचे स्वप्न पूर्ण करण्यासाठी मनापासून अभ्यास करण्याचे प्रेरणादायी मार्गदर्शन केले. तसेच पाचवीतील विद्यार्थ्यांना भावपूर्ण निरोप देण्यात आला.
कार्यक्रमात सपना महाजन यांनी विद्यार्थ्यांना निरागसपणा जपण्याचा सल्ला दिला, तर विद्यार्थ्यांनी शाळा व शिक्षकांविषयी कृतज्ञता व्यक्त केली. कार्यक्रमाच्या यशस्वी आयोजनासाठी नागेश मिराशे, सुवर्णा बाकडे आणि विद्यार्थ्यांनी विशेष परिश्रम घेतले. या उपक्रमामुळे विद्यार्थ्यांमध्ये शिक्षणाबद्दल नवा उत्साह निर्माण झाला असून, गरजू विद्यार्थ्यांना शैक्षणिक साहित्यामुळे मोठा आधार मिळाल्याचे समाधान व्यक्त करण्यात आले.
