अहमदपूर (जि. लातूर), दि. २३ एप्रिल २०२६ (गुरुवार) : अवैध विदेशी मद्याची वाहतूक व विक्री रोखण्यासाठी अहमदपूर पोलिसांनी विशेष मोहीम राबवत मोठी कारवाई केली. उपविभागीय पोलीस अधिकारी अरविंद रायबोले यांच्या मार्गदर्शनाखाली पार पडलेल्या या कारवाईत पोलिसांनी वाहनासह एकूण सुमारे ९ लाख ९६ हजार ८४० रुपयांचा मुद्देमाल जप्त केला.
गुप्त माहितीनुसार पोलिस पथकाने शहरातील प्रमुख मार्गावर सापळा रचून पाळत ठेवली होती. त्यावेळी एमएच 24 BX 0200 क्रमांकाची संशयित कार थांबवून तपासणी करण्यात आली. तपासणीदरम्यान वाहनात विविध नामांकित कंपन्यांच्या विदेशी मद्याच्या ९ बॉक्ससह काही सुट्या बाटल्या आढळून आल्या. जप्त मद्यसाठ्याची किंमत सुमारे ९६ हजार ८४० रुपये असून, वाहतुकीसाठी वापरलेली अंदाजे ९ लाख रुपये किमतीची कारही पोलिसांनी ताब्यात घेतली.
या प्रकरणी अहमदपूर पोलीस ठाण्यात गुन्हा रजिस्टर क्रमांक २२०/२०२६ नोंदविण्यात आला असून, महाराष्ट्र दारूबंदी कायद्याच्या कलम ६५ (अ)(इ), ८१ व ८३ अन्वये संजीव ज्ञानोबा सुडे, फिरोज मुसामिया मनियार (दोघे रा. लातूर) तसेच बंटी शेट (जिद्द वाईन शॉप) यांच्या विरोधात गुन्हा दाखल करण्यात आला आहे.
ही कारवाई पोलीस पथकातील अभिमन्यू रेचवाड, धर्मपाल गुट्टे, सुग्रीव देवळे व इतर कर्मचाऱ्यांनी समन्वयाने पार पाडली असून पुढील तपास सुरू आहे.
