वाटंगी (प्रतिनिधी) : “हिवतापमुक्त गाव आणि निरोगी समाज” हा संदेश जनतेपर्यंत पोहोचवण्यासाठी प्राथमिक आरोग्य केंद्र वाटंगी व अंतर्गत सर्व उपकेंद्रांमध्ये जागतिक हिवताप दिन उत्साहात साजरा करण्यात आला. या निमित्ताने आरोग्य विभागाकडून विविध जनजागृतीपर उपक्रम राबविण्यात आले.
या दिनानिमित्त गावोगावी जनजागृती रॅली, स्वच्छता अभियान, प्रबोधन सभा तसेच हिवताप (मलेरिया) प्रतिबंधक उपाययोजनांबाबत मार्गदर्शन करण्यात आले. हिवताप हा संक्रमित ॲनोफिलीस मादी डासाच्या चाव्यामुळे होणारा आजार असून त्याची लक्षणे, उपचार व प्रतिबंध याबाबत नागरिकांना सविस्तर माहिती देण्यात आली.
आरोग्य विभागाने नागरिकांना ताप, थंडी वाजणे, घाम येणे, डोकेदुखी, अशक्तपणा व अंगदुखी ही लक्षणे दिसल्यास त्वरित तपासणी करून घ्यावी, असे आवाहन केले. तसेच घर परिसर स्वच्छ ठेवणे, साचलेले पाणी नष्ट करणे, मच्छरदाणीचा वापर करणे यांसारख्या उपाययोजनांवर भर देण्यात आला.
गावपातळीवर कंटेनर तपासणी मोहीम राबवून पाण्याच्या टाक्या, कुलर, टायर, फुलदाण्या यांची पाहणी करण्यात आली. काही ठिकाणी डासांच्या अळ्या नष्ट करण्यासाठी साचलेल्या पाण्यात गप्पी मासे सोडण्यात आले.
तालुका आरोग्य अधिकारी डॉ. आर. जी. गुरव यांच्या मार्गदर्शनाखाली वैद्यकीय अधिकारी डॉ. शेख, आरोग्य निरीक्षक अतुल पाथरवट, आरोग्य सहाय्यक जे. एच. साबखान तसेच आरोग्य सेवकांनी गावपातळीवर जाऊन नागरिकांमध्ये जनजागृती केली. आशा स्वयंसेविका, युवक मंडळे व ग्रामस्थांनीही उत्स्फूर्त सहभाग नोंदवत परिसर स्वच्छ ठेवण्याचा निर्धार व्यक्त केला.
