रिसोड (प्रतिनिधी) : रिसोड शहरातील सिव्हिल लाईन परिसर अखेर पथदिव्यांच्या उजेडाने उजळून निघाला असून, नागरिकांच्या सातत्यपूर्ण पाठपुराव्यामुळे व नगरपरिषदेच्या सकारात्मक भूमिकेमुळे हा प्रश्न मार्गी लागला आहे. अनेक वर्षांपासून स्ट्रीट लाईटची समस्या भेडसावत असल्याने नागरिक व व्यापाऱ्यांना अडचणींचा सामना करावा लागत होता.
सिव्हिल लाईन हा शहरातील मुख्य मार्ग असून येथे मोठ्या प्रमाणात रहदारी असते. तसेच सकाळी फिरण्यासाठी येणारे ज्येष्ठ नागरिक व महिला यांच्यासाठी अंधारामुळे सुरक्षिततेचा प्रश्न निर्माण झाला होता. याबाबत नागरिकांनी वारंवार निवेदन देत प्रशासनाकडे पाठपुरावा केला होता.
या मागणीची दखल घेत नगरपरिषदेच्या मुख्याधिकाऱ्यांनी आवश्यक निधी उपलब्ध करून देत पथदिवे सुरू करण्याचे काम पूर्ण केले. परिणामी संपूर्ण परिसर उजळून निघाला असून नागरिकांमध्ये समाधानाचे वातावरण निर्माण झाले आहे.
स्थानिक नागरिकांनी व व्यापाऱ्यांनी प्रशासनाच्या या निर्णयाचे स्वागत केले असून भविष्यातही शहराच्या विकासासाठी अशाच सुविधा उपलब्ध करून द्याव्यात, अशी अपेक्षा व्यक्त केली जात आहे.
