नाशिक (प्रतिनिधी) : सद्गुरू श्री शंकर महाराज यांचा ७९ वा समाधी उत्सव सोहळा दि. २४ एप्रिल २०२६ रोजी उत्तम नगर, नाशिक येथील श्री शंकर महाराज मठात अत्यंत भक्तीमय वातावरणात साजरा करण्यात आला. मठाधिपती तथा श्री शंकर महाराजांचे वंशज संजय हिरे महाराज यांच्या मार्गदर्शनाखाली विविध धार्मिक व सामाजिक उपक्रमांचे आयोजन करण्यात आले.
उत्सवानिमित्त सकाळी महापूजा, शिवलिंग रुद्राभिषेक, पारायण समाप्ती तसेच होम-हवन करण्यात आले. दुपारी १२ वाजता महाआरती व महाप्रसादाचे आयोजन करण्यात आले असून, मोठ्या संख्येने उपस्थित भक्तांनी दर्शन व महाप्रसादाचा लाभ घेतला. संपूर्ण उत्तम नगर परिसर भक्तिमय वातावरणाने भारावून गेला होता.
या निमित्ताने डॉ. मंजुषा दराडे व डॉ. अद्वैत दराडे यांच्या मार्गदर्शनाखाली मोफत दंत तपासणी व रक्तदान शिबिराचे आयोजन करण्यात आले. यावेळी डॉ. दराडे यांनी उपस्थितांना आरोग्याबाबत महत्त्वपूर्ण मार्गदर्शन केले.
या सोहळ्यास अनेक भक्तांचे सहकार्य लाभले. कार्यक्रमाच्या यशस्वी आयोजनाबद्दल सद्गुरू श्री शंकर महाराज अन्नछत्र चॅरिटेबल ट्रस्ट, उत्तम नगर, नाशिक तसेच संजय हिरे महाराज यांनी सर्व भक्तांचे आभार मानले.
