कडेगाव (प्रतिनिधी) : कडेगाव पोलीस ठाण्याच्या हद्दीत कराड–कडेपूर मार्गावर प्रामाणिकपणाचे प्रेरणादायी उदाहरण समोर आले आहे. सेवानिवृत्त पोलीस अधिकारी जहांगिर इब्राहिम मुलाणी यांनी सापडलेली ₹२,१२,५०० रुपयांची रक्कम प्रामाणिकपणे पोलीसांकडे जमा करून संबंधित मालकास परत मिळवून दिली.
दि. २४ एप्रिल २०२६ रोजी पूजा हार्डवेअरसमोरून जात असताना डंपर (क्र. MH 11 AL 2101) मधून रोख रक्कम असलेली पिशवी रस्त्यावर पडली. त्याच मार्गाने मागून येणाऱ्या कार (क्र. MH 09 BB 5990) मधील चालक जहांगिर मुलाणी व त्यांचे सहकारी पंडितनाथ रामचंद्र ऊर्फ बाबुराव यादव (रा. कडेपूर, ता. कडेगाव) यांच्या निदर्शनास ही रक्कम आली.
दोघांनी तत्काळ रक्कम गोळा करून डंपर चालकाचा शोध घेण्याचा प्रयत्न केला. मात्र चालक न सापडल्याने त्यांनी कोणताही विलंब न लावता रक्कम कडेगाव पोलीस ठाण्यात जमा केली. पोलिसांनी तपास करून डंपर चालक हर्षवर्धन विजय मोहिते (रा. तोंडोली) यांच्याशी संपर्क साधला. चौकशीनंतर सदर रक्कम त्यांचीच असल्याचे स्पष्ट झाले. पोलीस उपनिरीक्षक कांबळे व त्यांच्या पथकाने खातरजमा करून ती रक्कम संबंधित चालकास परत दिली.
या घटनेत जहांगिर मुलाणी यांनी दाखवलेला प्रामाणिकपणा व सामाजिक बांधिलकी अत्यंत अनुकरणीय ठरली आहे. कडेगाव पोलीस ठाण्याच्या वतीने त्यांचा सन्मान करण्यात आला असून, त्यांच्या या कृतीमुळे पोलीस दलाबद्दल जनतेत विश्वास अधिक दृढ झाला आहे. अशा प्रकारच्या प्रामाणिक वर्तनामुळे समाजात सकारात्मक संदेश पसरत असून जबाबदार नागरिकत्वाचे उत्कृष्ट उदाहरण या घटनेतून पाहायला मिळते.
