वैजापूर (प्रतिनिधी) : वैजापूर तालुक्यातील गोदावरी काठावरील देवगाव शनी येथे गायरान जमिनीतून मोठ्या प्रमाणावर अवैध मुरूम व पोयटा उपसा सुरू असल्याचे समोर आले आहे. स्थानिकांकडून महसूल प्रशासनाच्या संगनमतामुळेच हा प्रकार दिवसाढवळ्या सुरू असल्याचा गंभीर आरोप करण्यात येत आहे.
माहितीनुसार, या भागातील गायरान जमिनीत जेसीबीच्या साहाय्याने मोठ्या प्रमाणावर मुरूम उपसा केला जात असून त्याची अवैध वाहतूकही सुरू आहे. यामुळे स्थानिक रस्त्यांची मोठ्या प्रमाणात हानी होत असून ग्रामस्थांना त्रास सहन करावा लागत आहे. महसूल विभागाच्या अधिकाऱ्यांकडून याकडे दुर्लक्ष होत असल्याने नागरिकांमध्ये नाराजीचे वातावरण निर्माण झाले आहे.
दरम्यान, राज्य शासन शेतकऱ्यांसाठी विविध योजना राबवत असताना प्रत्यक्षात स्थानिक पातळीवर अधिकाऱ्यांकडून आदेशांची पायमल्ली होत असल्याची टीका करण्यात येत आहे. देवगाव शनी चौफुली परिसरात अनेक बेकायदेशीर प्रकार सुरू असल्याचा आरोप असून विरगाव पोलीस प्रशासनालाही याची माहिती नसल्याबद्दल प्रश्नचिन्ह उपस्थित केले जात आहे.
या अवैध कामांमागे काही राजकीय पाठबळ असल्याचीही चर्चा नागरिकांमध्ये रंगली आहे. संबंधितांमध्ये भीतीचे वातावरण असल्याने गोरगरीब जनता याविरोधात आवाज उठवण्यास धजावत नसल्याचे सांगितले जाते. तसेच, गेल्या काही वर्षांत परिसरात चोरीच्या घटनांमध्येही वाढ झाल्याचे नागरिकांचे म्हणणे आहे.
या प्रकाराची तात्काळ चौकशी करून दोषींवर कारवाई करावी, अशी मागणी होत असून संबंधित प्रशासनाने दखल न घेतल्यास हा विषय वरिष्ठ स्तरावर नेण्यात येणार असल्याचा इशाराही देण्यात आला आहे.
