वर्धा | प्रतिनिधी
अंमली पदार्थांविरोधात वर्धा पोलिसांनी मोठी कारवाई करत गांजा वाहतूक करणाऱ्या आरोपीला रंगेहाथ पकडले आहे. जिल्हा पोलीस अधीक्षक सौरभ कुमार अग्रवाल यांच्या आदेशानुसार स्थानिक गुन्हे शाखेने ही धडक मोहीम राबवली.
दि. २४ एप्रिल २०२६ रोजी स्थानिक गुन्हे शाखेचे पथक हिंगणघाट परिसरात गस्त घालत असताना, मिळालेल्या गुप्त माहितीनुसार जाम ते हिंगणघाट राष्ट्रीय महामार्ग क्रमांक ४४ वरील मौजा रिमडोह शिवार, कोचर खरर्डा फॅक्टरीजवळ सापळा रचण्यात आला.
यावेळी सुझुकी बर्गमन (क्र. MH 32 AW 4877) या मोपेडवरून गांजा वाहतूक करत असलेला आरोपी अब्दुल रिजवान उर्फ टोनी शेख (वय ३०, रा. संत कबीर वॉर्ड, हिंगणघाट) याला पोलिसांनी रंगेहाथ ताब्यात घेतले.
तपासणीदरम्यान आरोपीकडून २ किलो २२८ ग्रॅम गांजा तसेच मोपेडसह एकूण ₹१,५५,७०० किमतीचा मुद्देमाल जप्त करण्यात आला. पुढील तपासात हा गांजा नागपूर येथील जावेद शेख याने पुरवठा केल्याचे निष्पन्न झाले.
या प्रकरणी NDPS Act अंतर्गत हिंगणघाट पोलीस स्टेशन येथे गुन्हा दाखल करण्यात आला असून दोन्ही आरोपींविरुद्ध कारवाई सुरू आहे.
ही कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे यांच्या मार्गदर्शनाखाली पोलीस निरीक्षक विनोद चौधरी, उपनिरीक्षक प्रकाश लसुंते आणि स्थानिक गुन्हे शाखेच्या पथकाने यशस्वीपणे पार पाडली.
अंमली पदार्थांविरोधातील अशा कारवायांमुळे गुन्हेगारीला आळा बसण्यास मदत होणार असल्याचे पोलिसांनी सांगितले.
