शहादा | दि. २६
नंदुरबार जिल्ह्यातील सामाजिक, सांस्कृतिक व धार्मिक क्षेत्रात मोलाचे योगदान देणारे ज्येष्ठ सामाजिक कार्यकर्ते आत्माराम चैत्राम इंदवे (बापूसाहेब इंदवे) यांना जीवन गौरव पुरस्कार २०२६ प्रदान करण्यात आला. संकल्प निर्माण फाऊंडेशन, नंदुरबारतर्फे त्यांच्या उल्लेखनीय कार्याची दखल घेत हा प्रतिष्ठेचा सन्मान देण्यात आला.
दि. २० एप्रिल रोजी नंदुरबार येथे आयोजित भव्य समारंभात मान्यवरांच्या हस्ते त्यांना गौरवचिन्ह व सन्मानपत्र देऊन सन्मानित करण्यात आले.
बापूसाहेब इंदवे हे आरोग्य विभागातील सेवानिवृत्त पर्यवेक्षक असून त्यांनी शासकीय सेवेत तसेच निवृत्तीनंतरही समाजसेवेत सक्रिय योगदान दिले आहे. ते बुद्ध-आंबेडकरी सेवानिवृत्त फाऊंडेशन चे संस्थापक संचालक असून विविध सामाजिक संस्थांमध्ये त्यांनी मार्गदर्शक म्हणून काम केले आहे. तसेच लुम्बिनी बुद्ध विहार व पेन्शनर संघटना, ज्येष्ठ नागरिक संघटना यांसारख्या संस्थांशीही त्यांचा सक्रिय सहभाग राहिला आहे.
आरोग्य व सामाजिक क्षेत्रातील त्यांच्या कार्याची दखल यापूर्वीही घेण्यात आली असून २०११ मध्ये आंतरभारती रुरल इंटरनॅशनल मेडिकल एज्युकेशन ट्रस्ट या संस्थेकडून त्यांचा सन्मान करण्यात आला होता.
या पुरस्कारानंतर लुम्बिनी बुद्ध विहार चॅरिटेबल ट्रस्ट तसेच स्थानिक नागरिकांकडून त्यांच्यावर अभिनंदनाचा वर्षाव होत आहे. त्यांच्या पुढील सामाजिक, सांस्कृतिक व धार्मिक कार्यासाठी उत्तम आरोग्य व दीर्घायुष्य लाभो, अशा शुभेच्छा व्यक्त करण्यात आल्या.
