शहादा, दि. २६ : तालुक्यातील कुमारी नुपूर पाटील हिची मुंबई येथील मंत्रालयात डायरेक्टोरेट जनरल ऑफ इन्फॉर्मेशन अँड पब्लिक रिलेशन्स विभागात ‘कन्टेन्ट रायटर व क्रिएटर’ म्हणून नियुक्ती झाली असून, तिच्या या यशामुळे शहादा परिसरात अभिमानाचे वातावरण निर्माण झाले आहे.
गुजर समाजातील सुसंस्कारित कुटुंबातून आलेल्या नुपूर पाटील हिला लहानपणापासूनच शिक्षण व सामाजिक जाणीवेचे संस्कार लाभले. तिचे वडील मधुकर जाधव पाटील हे शेती व्यवसायात कार्यरत असून, आई सौ. नीलिमा पाटील या वाल्मिकी माध्यमिक विद्यालयात शिक्षिका आहेत. कुटुंबाच्या पाठबळामुळे आणि स्वतःच्या जिद्दीमुळे नुपूरने हे यश संपादन केले.
गेल्या काही वर्षांपासून नुपूर पाटील मराठी वृत्तवाहिन्या व वर्तमानपत्रांमध्ये पत्रकार म्हणून कार्यरत होती. समाजातील विविध प्रश्न, घडामोडी आणि वास्तव यांचे प्रभावी लेखन करत तिने स्वतःची वेगळी ओळख निर्माण केली. तिच्या सातत्यपूर्ण मेहनतीमुळे आणि अभ्यासू वृत्तीमुळे तिला मंत्रालयातील ‘नवमाध्यम विभागात’ ही महत्त्वाची जबाबदारी मिळाली आहे.
विशेष म्हणजे, लेवा पाटीदार गुजर समाजातील या पदावर कार्यभार स्वीकारणाऱ्या त्या एकमेव महिला असल्याने ही बाब अधिकच गौरवास्पद ठरली आहे.
नुपूर पाटील हिच्या या यशाबद्दल शहादा तालुक्यासह विविध स्तरातून तिचे अभिनंदन करण्यात येत असून, तिच्या पुढील वाटचालीसाठी शुभेच्छांचा वर्षाव होत आहे.
