शहादा शहरात उन्हाळ्याच्या दिवसांतही डासांचा प्रचंड प्रादुर्भाव जाणवत असून नागरिक अक्षरशः त्रस्त झाले आहेत. डासांच्या वाढत्या संख्येमुळे शहरात विविध साथीच्या आजारांचा धोका निर्माण झाला आहे. कडक उन्हामुळे काही प्रमाणात डासांचे प्रमाण कमी झाले असले तरी संध्याकाळ आणि सकाळच्या वेळेत डासांचा त्रास अधिक जाणवत असल्याचे नागरिकांचे म्हणणे आहे
डासांमुळे नागरिकांना घरात बसणेही कठीण झाले आहे. बाजारात उपलब्ध असलेली डास निर्मूलन अगरबत्ती, इलेक्ट्रिक साधने यांसारख्या उपाययोजना करूनही फरक पडत नसल्याने नागरिकांमध्ये मोठा रोष निर्माण झाला आहे. विशेषतः महिलांकडून जुन्या वस्त्यांसह नवीन वसाहतींमध्ये औषधी फवारणी करण्याची वारंवार मागणी होत होती.
या पार्श्वभूमीवर शहादा नगरपालिकेच्या आरोग्य विभागाने संपूर्ण शहरात फॉगिंग मशीनद्वारे औषधी फवारणी मोहीम युद्धपातळीवर सुरू केली आहे. आतापर्यंत वेळोवेळी फवारणी करण्यात आली असली तरी ती प्रभावीपणे आणि सर्व भागात न झाल्याने डासांचे प्रमाण वाढल्याचे स्पष्ट झाले आहे.
नगरपालिकेने प्रत्येक प्रभागात संध्याकाळी ६ वाजेनंतर फॉगिंग मशीनद्वारे औषधी फवारणी सुरू केली आहे. ही मोहीम अधिक प्रभावी ठरेल, असा विश्वास प्रशासनाने व्यक्त केला आहे. नागरिकांचे आरोग्य हेच प्राधान्य असल्याने कोणताही भेदभाव न करता संपूर्ण शहरात फवारणी केली जाणार आहे, असे आरोग्य विभागाने स्पष्ट केले आहे.
शहरातील नवीन वसाहतींमधील मोकळ्या प्लॉटचा प्रश्नही गंभीर बनला आहे. अनेक ठिकाणी प्लॉटमध्ये सांडपाणी साचल्याने डासांची उत्पत्ती मोठ्या प्रमाणावर होत आहे. तसेच वाढलेल्या काटेरी झुडपांमुळे डासांना आश्रय मिळत आहे. या झुडपांची सफाई आणि प्लॉट स्वच्छ ठेवण्याबाबत नागरिकांना वारंवार सूचना देण्यात आल्या आहेत.
या संदर्भात नवनिर्वाचित आरोग्य सभापती सुनील काशिनाथ पाटील यांनी तातडीने दखल घेत फॉगिंग मोहीम सुरू केली आहे. त्यांनी नागरिकांना नगरपालिका प्रशासनाला सहकार्य करण्याचे आवाहन केले आहे. “प्रत्येक प्रभागात नगरसेवकांनी पुढाकार घेऊन फवारणी करून घ्यावी, ही मोहीम भेदभाव न करता राबवली जाईल,” असे त्यांनी सांगितले.
दरम्यान, मुख्याधिकारी साजिद पिंजारी यांनी स्पष्ट इशारा दिला आहे की, नवीन वसाहतींमधील मोकळ्या प्लॉटमध्ये सांडपाणी सोडणाऱ्यांवर आणि अस्वच्छता ठेवणाऱ्यांवर कडक कारवाई केली जाईल. प्लॉटधारकांनी स्वतःहून स्वच्छता राखावी, असेही त्यांनी सांगितले.
सध्या संपूर्ण शहादा शहरात डासांच्या त्रासामुळे नागरिक हैराण झाले असून, प्रशासनाच्या या युद्धपातळीवरील फॉगिंग मोहिमेकडे नागरिकांचे लक्ष लागले आहे.
