श्रीगोंदा (प्रतिनिधी)
श्रीगोंदा येथील महाराजा जिवाजीराव शिंदे महाविद्यालयाच्या ज्युनिअर विभागातील इतिहास विषयाचे प्राध्यापक प्रा. रमेश भुजबळ यांच्या सेवापूर्ती निमित्त आयोजित कृतज्ञता समारंभ उत्साहात पार पडला.
या समारंभाच्या अध्यक्षस्थानी रयत शिक्षण संस्थेचे जनरल बॉडी सदस्य बाबासाहेब भोस हे होते. आपल्या अध्यक्षीय भाषणात त्यांनी प्रा. भुजबळ यांनी केलेल्या उल्लेखनीय सेवेस गौरविले. “रयत शिक्षण संस्थेच्या मूल्यांची जपणूक करणारे आणि विद्यार्थ्यांप्रती समर्पित असलेले शिक्षक म्हणजे प्रा. रमेश भुजबळ,” असे ते म्हणाले.
कार्यक्रमासाठी कर्मवीर भाऊराव पाटील विद्यापीठाचे कुलगुरू डॉ. ज्ञानदेव म्हस्के प्रमुख पाहुणे म्हणून उपस्थित होते. त्यांनी आपल्या मनोगतात प्रा. भुजबळ यांच्या समर्पित व निष्ठावान सेवाभावाचे कौतुक केले.
महाविद्यालयाचे प्राचार्य डॉ. प्रकाश साळवे यांनी प्रास्ताविक करून उपस्थितांचे स्वागत केले व सेवापूर्ती निमित्त शुभेच्छा दिल्या. यावेळी रयत शिक्षण संस्थेचे माजी सहसचिव प्राचार्य डॉ. के. एच. शिंदे, प्राचार्य डॉ. दीनानाथ पाटील, उत्तमराव आवारी, विभागीय अधिकारी नवनाथ बोडखे, मिलिंद दरेकर, प्रा. विनोद सासवडकर, अजिंक्य भुजबळ आदी मान्यवरांनी मनोगते व्यक्त करून प्रा. भुजबळ यांच्या कार्याचा गौरव केला.
याप्रसंगी प्रा. रमेश भुजबळ व सौ. सीमा भुजबळ यांचा तसेच त्यांच्या आई-वडिलांचा सत्कार करण्यात आला. सत्कारमूर्ती प्रा. भुजबळ यांनी आपल्या मनोगतातून जीवनप्रवास व कार्यातील अनुभव मांडले.
कार्यक्रमाला महावीर पटवा, प्राचार्य शहाजी मखरे, रंगनाथ राजपुरे, नगरसेवक राजेंद्र खेडकर, प्राचार्य दिलीप भुजबळ, रवीशेठ दंडनाईक, संतोष दरेकर, अंबादास दरेकर, सुनील अनभुले, माजी प्राचार्य डॉ. ज्ञानदेव भोसले, प्रा. विजयकुमार नन्नवरे, प्रा. शिवाजी सोनावळे, सलीम सय्यद, अशोक गोंधळी, डॉ. नितीन थोरात, डॉ. सुदाम भुजबळ आदी उपस्थित होते.
कार्यक्रमाचे सूत्रसंचालन प्रा. संजय फटे यांनी केले, तर आभार प्रदर्शन प्रा. रत्नाकर झिटे यांनी मानले.
