कणकवली (प्रतिनिधी)
कणकवली तालुका पत्रकार संघाच्या वतीने दरवर्षीप्रमाणे पत्रकारांसह विविध क्षेत्रात उत्कृष्ट कार्य करणाऱ्या मान्यवरांचा गौरव करण्यासाठी पुरस्कार वितरण सोहळ्याचे आयोजन करण्यात आले आहे. हा सोहळा शनिवार, २ मे २०२६ रोजी सकाळी १० वाजता स्वामी विवेकानंद सभागृह, प्रहार भवन येथे पार पडणार आहे.
या कार्यक्रमाला मत्स्य व बंदरे विकास मंत्री तथा पालकमंत्री नितेश राणे यांची प्रमुख उपस्थिती लाभणार असून, सभापती हर्षदा वाळके, नगराध्यक्ष संदेश पारकर, पत्रकार संघाचे जिल्हाध्यक्ष उमेश तोरस्कर तसेच जिल्हा माहिती अधिकारी मुकुंद चिलवंत यांच्यासह अनेक मान्यवर उपस्थित राहणार आहेत.
या सोहळ्यात आचार्य बाळशास्त्री जांभेकर ज्येष्ठ पत्रकार पुरस्कार संजय माळवदे यांना प्रदान करण्यात येणार आहे. ज्येष्ठ पत्रकार कै. शशी तायशेट्ये यांचाही सन्मान केला जाणार आहे. उत्कृष्ट पत्रकार पुरस्कार चंद्रशेखर देसाई (दै. तरुण भारत) यांना, तर कै. अनिल सावंत स्मृती ग्रामीण पत्रकार पुरस्कार संतोष पाटणकर (दै. लोकमत – खारेपाटण) यांना दिला जाणार आहे.
तसेच उत्कृष्ट छायाचित्रकार पुरस्कार प्रथमेश जाधव, यशस्वी उद्योजक पुरस्कार संदीप चौकेकर (अध्यक्ष – प्राणजीवन संयोग संस्था), सामाजिक कार्यकर्ता पुरस्कार उत्तम पुजारे, तर वृत्तपत्र कर्मचारी सन्मान पुरस्कार भास्कर रासम (दै. सकाळ) यांना प्रदान करण्यात येणार आहे.
याशिवाय वृत्तपत्र विक्रेते मालोजी कोकरे (कणकवली), अरविंद मुद्राळे (तळेरे) आणि बाळा फोंडके (फोंडाघाट) यांचा शाल, श्रीफळ व सन्मानचिन्ह देऊन गौरव करण्यात येणार आहे. खारेपाटण येथील कै. सौ. विना राजेंद्र ब्रह्मदंडे यांच्या मरणोत्तर अवयवदानातून अनेकांना नवजीवन मिळाल्याबद्दल त्यांच्या पती राजेंद्र ब्रह्मदंडे यांचा विशेष सन्मान करण्यात येणार आहे.
या कार्यक्रमाला उपस्थित राहण्याचे आवाहन तालुका पत्रकार संघाचे अध्यक्ष भगवान लोके, सचिव संजय सावंत आणि खजिनदार रोशन तांबे यांनी केले आहे.
