नांदेड (प्रतिनिधी)
मराठवाडा विभागात सुरू असलेल्या तीव्र उष्णतेच्या पार्श्वभूमीवर नांदेड येथील गुरुद्वारा तख्त सचखंड श्री हजूर अबचलनगर साहिब येथे दर्शनासाठी येणाऱ्या भाविकांच्या सोयीसाठी विशेष उपाययोजना करण्यात आल्या आहेत.
गुरुद्वारा सचखंड बोर्डाचे प्रशासक डॉ. विजय सतबीर सिंघ (IAS, निवृत्त) यांच्या निर्देशानुसार, गुरुद्वाराच्या सर्व प्रवेशद्वारांवर तसेच परिसरातील स्थानिक गुरुद्वारांमध्ये भाविकांसाठी शुद्ध व थंड पाण्याची व्यवस्था करण्यात आली आहे. उष्माघाताचा धोका लक्षात घेऊन प्रथमोपचार पेट्या (First-Aid kits) देखील उपलब्ध करून देण्यात आल्या आहेत.
भाविकांच्या आरोग्याची काळजी घेत लंगरसोबत थंड लस्सी देण्याची व्यवस्था करण्यात आली आहे. तसेच सर्व निवासस्थाने, प्रशासकीय कार्यालये आणि स्थानिक गुरुद्वारांमधील कर्मचाऱ्यांना सतर्क राहण्याच्या सूचना देण्यात आल्या आहेत.
याशिवाय, २ व ३ मे २०२६ रोजी होणाऱ्या सामूहिक विवाह सोहळ्यादरम्यान या सर्व उपाययोजनांचे काटेकोर पालन करण्याचे आदेश देण्यात आले असून, रुग्णवाहिका सेवा आणि वैद्यकीय सुविधा पूर्णतः तत्पर ठेवण्यावर विशेष भर देण्यात आला आहे.
या उपाययोजनांमुळे उष्णतेच्या तीव्रतेतही भाविकांना सुरक्षित व सुसह्य दर्शनाचा अनुभव मिळावा, हा गुरुद्वारा प्रशासनाचा उद्देश असल्याचे सांगण्यात आले.
