कन्नड (प्रतिनिधी)
जिद्द, चिकाटी आणि कठोर परिश्रमाच्या जोरावर ग्रामीण भागातील तरुणही यशाची उत्तुंग शिखरे सर करू शकतात, याचे उदाहरण ताडपिंपळगाव (ता. कन्नड) येथील गणेश नवनाथ राहणे यांनी दाखवून दिले आहे. शेतकरी कुटुंबातील गणेश यांची जालना पोलीस दलात पोलीस शिपाई पदावर निवड झाली असून, त्यांच्या या यशामुळे परिसरात आनंदाचे वातावरण पसरले आहे.
यशाचा खडतर प्रवास
गणेश यांचे कुटुंब शेतीवर उदरनिर्वाह करते. घरची आर्थिक परिस्थिती साधी असतानाही त्यांनी आपले ध्येय कायम डोळ्यासमोर ठेवले. नियमित अभ्यासासोबतच त्यांनी मैदानी सरावावर भर दिला. कोणत्याही विशेष मार्गदर्शनाशिवाय केवळ स्वतःच्या मेहनतीच्या जोरावर त्यांनी हे यश मिळवले. नुकत्याच पार पडलेल्या पोलीस भरती प्रक्रियेत त्यांनी उत्कृष्ट कामगिरी करत जालना पोलीस दलात स्थान मिळवले.
गावासाठी अभिमानाचा क्षण
गणेश यांच्या निवडीची बातमी समजताच ताडपिंपळगावात आनंदाचे वातावरण निर्माण झाले. एका शेतकरी पुत्राने ‘खाकी’ वर्दी मिळवून गावाचे नाव उज्ज्वल केल्याबद्दल ग्रामस्थांकडून त्यांच्यावर कौतुकाचा वर्षाव होत आहे.
