(प्रतिनिधी)
पुणे येथील नामांकित संस्थेच्या वतीने आयोजित ‘स्कूल संसद’ या नाविन्यपूर्ण उपक्रमांतर्गत आलेगाव येथील जैन साध्वी प्रभा प्रकाश कॉन्व्हेंटच्या इयत्ता ९ वीतील विद्यार्थी प्रग्यान धारतरकर याची राज्यस्तरावर निवड झाली आहे. या उपक्रमात त्याला ‘स्टुडंट एमपी’ आणि पक्ष प्रमुख ही सन्माननीय पदवी मिळाली असून, त्याला विधान भवन येथे भेट देण्याची संधी मिळाली आहे.
विद्यार्थ्यांमध्ये लोकशाही मूल्यांची जाणीव निर्माण करणे, संसदीय कार्यपद्धतीची ओळख करून देणे आणि नेतृत्वगुण विकसित करणे हा या उपक्रमाचा मुख्य उद्देश आहे. यावर्षी राज्यभरातून हजारो विद्यार्थ्यांनी सहभाग घेतला होता, त्यापैकी केवळ १४५ विद्यार्थ्यांची अंतिम निवड करण्यात आली.
विधान भवन भेटीदरम्यान विधानसभा सहसचिव नागनाथ थेटे यांनी विद्यार्थ्यांशी संवाद साधत विधानसभेची रचना, कामकाज, प्रश्नोत्तर प्रक्रिया तसेच लोकशाहीतील महत्त्वाच्या बाबींची सविस्तर माहिती दिली. या अनुभवामुळे विद्यार्थ्यांच्या ज्ञानात भर पडल्याचे सांगण्यात आले.
प्रग्यानने आपल्या यशाचे श्रेय गटशिक्षणाधिकारी प्रवीण डाबेराव, केंद्रप्रमुख निवास चव्हाण, शाळेचे अध्यक्ष अक्षय जैन, मुख्याध्यापक महावीर जैन तसेच शिक्षिका प्रगती महल्ले आणि वर्गशिक्षक निलेश पस्तापुरे यांना दिले आहे.
प्रग्यानच्या या उल्लेखनीय यशाबद्दल परिसरात आणि शैक्षणिक क्षेत्रात त्याच्यावर अभिनंदनाचा वर्षाव होत असून, हा अनुभव त्याच्या भविष्यातील वाटचालीसाठी प्रेरणादायी ठरणार असल्याचे मत व्यक्त करण्यात येत आहे.
