“संस्कृती जपण्यासाठी गोमातेचे संवर्धन गरजेचे”

कन्नड (प्रतिनिधी)
गोमातेच्या सेवा, संरक्षण आणि सन्मानासाठी कन्नड शहरात श्री मुरारी पारीक परिवार आणि सकल हिंदू समाजाच्या वतीने भव्य रॅली काढण्यात आली. २७ एप्रिल रोजी आयोजित करण्यात आलेल्या या रॅलीला नागरिकांचा उत्स्फूर्त प्रतिसाद मिळाला.

पिशोर नाका येथून अत्यंत शिस्तीत सुरू झालेली ही रॅली तहसील कार्यालयापर्यंत पोहोचली. यानंतर तहसीलदार यांना गोमाता सेवा, संरक्षण आणि सन्मान याबाबत निवेदन सादर करण्यात आले.

या रॅलीत हजारो हिंदू बांधव सहभागी झाले होते. “जय श्रीराम”च्या घोषणांनी वातावरण दुमदुमले होते. विशेष म्हणजे तरुणांसह आबालवृद्धांचा मोठा सहभाग रॅलीचे आकर्षण ठरला आणि समाजातील एकतेचे दर्शन घडले.

या कार्यक्रमात प.पू. महामंडलेश्वर मुक्तानंदजी महाराज, प.पू. चैतन्य आनंद महाराज, ह.भ.प. नवनाथ महाराज (सुर पाळा), ह.भ.प. दत्ता महाराज कदम, सुरेश महाराज आढाव, मनीष महाराज झाल्टे, लखन महाराज यांची उपस्थिती होती.

तसेच भाजपा नेते व उद्योजक मनोज केशवराव पवार यांनी घोषणाबाजी करत सहभाग नोंदविला. श्री सुभाष पारीक, राजेंद्र पारीक, माजी आमदार हर्षवर्धन जाधव, लहाने सर, डॉ. अण्णासाहेब शिंदे, सुनील पवार, नारळी गुरुजी, आनंद पांडे, मुन्ना खंडेलवाल यांसह अनेक मान्यवरांच्या उपस्थितीने कार्यक्रमाची शोभा वाढली.