कल्याण तालुका (प्रतिनिधी)
डोंबिवलीतील तरुणांना रोजगाराभिमुख कौशल्ये मिळावीत यासाठी निळजे येथे १५ मेपर्यंत सहा नव्या स्किल डेव्हलपमेंट केंद्रांची उभारणी करण्यात येणार असून, जूनपासून ही केंद्रे कार्यान्वित होणार आहेत.
या केंद्रांमध्ये लॉजिस्टिक्स, डेटा सेंटर, एअरपोर्ट मॅनेजमेंट असिस्टंट, आर्टिफिशियल इंटेलिजन्स, फॉरेन लँग्वेज आणि सोलर एनर्जी असे विविध अभ्यासक्रम उपलब्ध करून दिले जाणार आहेत. दरमहा सुमारे १,००० विद्यार्थ्यांना या माध्यमातून प्रशिक्षण दिले जाणार आहे.
ही घोषणा मंगल प्रभात लोढा यांनी केली. विशेष म्हणजे आगरी समाजातील विद्यार्थ्यांसाठी ५० टक्के जागा राखीव ठेवण्यात येणार असून, केवळ ५०० रुपयांच्या नाममात्र शुल्कात हे प्रशिक्षण उपलब्ध होणार आहे.
आगरी युथ फोरम, डोंबिवली आणि लोढा चॅरिटेबल ट्रस्ट यांच्या संयुक्त विद्यमाने आयोजित कार्यक्रमात ही माहिती देण्यात आली. यावेळी ७५ होतकरू विद्यार्थ्यांना प्रत्येकी १० हजार रुपयांची आर्थिक मदतही देण्यात आली.
