रिसोड (प्रतिनिधी)
रिसोड ते डोणगाव दरम्यानची एसटी बस सेवा तात्काळ पूर्ववत सुरू करण्यात यावी, अशी मागणी स्थानिक नागरिकांच्या वतीने करण्यात आली आहे. याबाबत अॅड. सतीश पंडित यांनी रिसोड आगार व्यवस्थापकांना निवेदन सादर केले.
मिळालेल्या माहितीनुसार, या मार्गावर पूर्वी सकाळी १०:०० वाजता आणि संध्याकाळी ५:०० वाजता एसटीच्या नियमित फेऱ्या सुरू होत्या. मात्र, रस्त्याचे काम सुरू असल्याने या फेऱ्या तात्पुरत्या स्वरूपात बंद करण्यात आल्या होत्या. आता रस्त्याचे काम पूर्ण झाले असून वाहतुकीसाठी मार्ग खुला झाला आहे.
मोठेगाव, सरपखेड, धोडप बोडखे, लेहणी, आरेगात आणि डोणगाव येथील नागरिकांना व्यापारी कामे, वैद्यकीय सेवा तसेच शैक्षणिक कारणांसाठी दररोज रिसोड येथे ये-जा करावी लागते. बस सेवा बंद असल्यामुळे नागरिकांना खाजगी वाहनांवर अवलंबून राहावे लागत असून त्यामुळे आर्थिक, शारीरिक व मानसिक त्रास सहन करावा लागत आहे.
ही समस्या लक्षात घेऊन अॅड. सतीश आत्माराम पंडित, माणिक श्रीराम खिल्लारे आणि मोतीराम नामदेव साबळे यांनी पुढाकार घेत एसटी प्रशासनाकडे सेवा पुन्हा सुरू करण्याची मागणी केली आहे.
