चिमूर (प्रतिनिधी): चिमूर तालुक्यातील मौजा मदनापूर येथे श्री गुरुदेव शेतकरी बैलगाडा मंडळ आणि सर्व गावकरी यांच्या संयुक्त विद्यमाने भव्य ‘बैलांचा कृषी मेळावा’ म्हणजेच ‘शंकरपट’ आयोजित करण्यात आला आहे. या थरारक स्पर्धा मंगळवार, दिनांक २८ एप्रिल २०२६ पासून सुरू होणार असून रविवार, २४ मे २०२६ पर्यंत चालणार आहेत. या निमित्ताने पंचक्रोशीतील पट प्रेमी आणि शेतकऱ्यांसाठी एक मोठी पर्वणी चालून आली आहे.
या भव्य कार्यक्रमाचे उद्घाटन क्षेत्र सहाय्यक मा. श्री. अमोल कवासे साहेब यांच्या हस्ते होणार असून, सहउद्घाटक म्हणून मदनापूरचे पोलीस पाटील मा. श्री. नरेश भरडे उपस्थित राहणार आहेत. कार्यक्रमाचे अध्यक्षस्थान विहीरगावचे माजी सरपंच मा. डॉ. रहेमान खाँ पठाण हे भूषवणार आहेत.
तसेच प्रमुख अतिथी म्हणून मदनापूरच्या सरपंच मा. सौ. गीताताई श्रीरामे, बावनकर गुरुजी, वनरक्षक दाते साहेब, ई.डी.सी. अध्यक्षा सपनाबाई जांभुळे, धान्य व्यापारी मधुकर भोयर, ग्रा.प. सदस्य राजेंद्र भरडे, मोरेश्वर डुमरे, प्रकाशजी केळझरकर, वामनजी भरडे, भगवानजी केळझरकर आणि उद्धवजी चौधरी आदी मान्यवर उपस्थित राहणार आहेत.
या शंकरपटात विजेत्या बैलजोड्यांना स्टील, पितळ व जर्मनीची भांडी, पाण्याची कॅन, मिक्सर आणि टेबल फॅन अशी आकर्षक बक्षिसे देऊन गौरविण्यात येणार आहे. विशेष म्हणजे, दूरवरून येणाऱ्या व स्पर्धेत सहभागी होणाऱ्या बैलजोडी आणि त्यांच्या मालकांच्या जेवणाची तसेच राहण्याची उत्तम व्यवस्था आयोजकांकडून करण्यात आली आहे. स्पर्धेचे सर्व नियम व अटी मंडळाने निश्चित केल्या असून पंचांचा निर्णय अंतिम राहील.
तरी सर्व पट प्रेमी बांधवांनी आपापल्या बैलजोड्या घेऊन या स्पर्धेत मोठ्या संख्येने सहभागी व्हावे आणि या कृषी मेळाव्याची शोभा वाढवावी, असे आवाहन ‘श्री गुरुदेव शेतकरी बैलगाडा मंडळ’ आणि मदनापूरच्या सर्व गावकऱ्यांनी केले आहे. अधिक माहितीसाठी व नावनोंदणीसाठी मंडळाच्या पदाधिकाऱ्यांशी संपर्क साधता येईल.
