दोंडाईचा (प्रतिनिधी)
दोंडाईचा शहरातील बियाणे, खत व कीटकनाशक विक्रेत्यांनी विविध मागण्यांसाठी कडकडीत बंद पाळत बेमुदत आंदोलनाला पाठिंबा दर्शविला. शहरातील अध्यक्ष रणजीत राजपूत आणि माफदा (MAFDA)चे राज्य सचिव संजय अग्रवाल यांच्या नेतृत्वाखाली हा बंद पाळण्यात आला.
अनधिकृत एचटीबीटी बियाण्यांच्या विक्रीविरोधात कारवाई, खत कंपन्यांकडून केली जाणारी ‘लिंकिंग’ पद्धत, तसेच अवैध कीटकनाशके व खते थेट अनधिकृत एजंटमार्फत शेतकऱ्यांना विक्री याविरोधात विक्रेत्यांनी तीव्र नाराजी व्यक्त केली.
तसेच ‘साथी’ पोर्टल ॲपद्वारे बियाणे विक्री सक्तीची करणे, किरकोळ विक्रेत्यांवर लादलेले कडक नियम, कीटकनाशक कंपन्यांकडून एक्सपायरी माल परत न घेणे आणि नवीन बियाणे व कीटकनाशके कायद्यांमुळे होणारा त्रास याविरोधातही विक्रेत्यांनी निषेध नोंदविला.
या आंदोलनात शहरातील कृषी विक्रेते गोलू शेठ लखोटिया, आप्पासाहेब रामराजे, अशोक पाटील, दीपक पाटील, चंद्रकांत पाटील, सुमित जैन, अमृत पाटील, छोटूदादा गिरासे, सनी अग्रवाल, विजय पाटील, अनिल कोळी, प्रदीप पाटील, आनंद गिरासे, गजेंद्र गिरासे, कुलदीप गिरासे, शैलेश बोरसे, प्रवीण मोरे, हातिम भाई, तमीम भाई, आप्पा गिरासे आदी मोठ्या संख्येने सहभागी झाले.
मागण्या मान्य होईपर्यंत आंदोलन सुरू ठेवण्याचा इशारा विक्रेत्यांनी दिला आहे.
