शहादा, दि.२७ (प्रतिनिधी)
देशभरात सुरू असलेल्या ‘गौ सन्मान अभियान’ अंतर्गत शहादा शहरात भव्य रॅलीचे आयोजन करण्यात आले. गौमातेला ‘राष्ट्रमाता’ म्हणून घोषित करण्याच्या मागणीसाठी आयोजित या रॅलीत हिंदू समाज बांधवांसह विविध राजकीय व सामाजिक संघटनांचा उत्स्फूर्त सहभाग पाहायला मिळाला. संपूर्ण शहर ‘जय श्रीराम’च्या घोषणांनी दुमदुमून गेले होते.
सोमवारी सकाळी १० वाजता चावडी चौक येथील ऐतिहासिक श्रीराम मंदिरापासून रॅलीला सुरुवात झाली. रॅलीच्या अग्रभागी साधुसंत व मान्यवर उपस्थित होते. यामध्ये शहादा नगरपालिकेच्या उपनगराध्यक्ष सौ. माधवीताई मकरंद पाटील, भाजपचे जिल्हा उपाध्यक्ष प्रा. मकरंद पाटील, डॉ. कांतीलाल टाटिया, विश्व हिंदू परिषदेचे ज्येष्ठ पदाधिकारी अजय शर्मा, हभप खगेंद्र महाराज, हभप हर्षल महाराज यांचा समावेश होता.
शहरातील मुख्य बाजारपेठेतून मार्गक्रमण करत रॅली प्रांताधिकारी कार्यालयावर पोहोचली. येथे शिष्टमंडळाने आपल्या मागण्यांचे निवेदन प्रशासनाला सादर केले. उपस्थित मान्यवरांनी गौमातेचे धार्मिक, सांस्कृतिक व आर्थिक महत्त्व अधोरेखित करत तिला ‘राष्ट्रमाता’ दर्जा देण्याची मागणी केली.
या रॅलीत विश्व हिंदू परिषद, बजरंग दल, राष्ट्रीय स्वयंसेवक संघ आणि भारतीय जनता पक्षाचे कार्यकर्ते मोठ्या संख्येने सहभागी झाले होते. महिलांचीही लक्षणीय उपस्थिती या रॅलीचे विशेष आकर्षण ठरली. हातात भगवे ध्वज व फलक घेऊन कार्यकर्त्यांनी सहभाग नोंदविला.
दरम्यान, रॅली सुरू असताना नगरपालिकेच्या आरोग्य व स्वच्छता विभागाने मार्गावरील गटारी साफ करून काढलेली घाण रस्त्यावरच ठेवल्याने दुर्गंधी पसरली. या प्रकारामुळे आंदोलकांनी तीव्र संताप व्यक्त करत पालिकेच्या कामकाजाचा निषेध केला.
रॅलीदरम्यान कोणताही अनुचित प्रकार घडू नये यासाठी शहादा पोलीस ठाण्याचे पोलीस निरीक्षक हेमंत कुमार पाटील यांच्या मार्गदर्शनाखाली कडक पोलीस बंदोबस्त ठेवण्यात आला होता. रॅली शांततेत पार पडली.
